कृषि प्रदर्शनीमा उत्कृष्ट हुने कृषकहरु पुरस्कृत

थाहानगरमा जारी चौथो थाहा महोत्सवको अवसरमा आयोजित कृषि मेला प्रदर्शनीमा राखिएको कृषि उपजहरुबाट उत्कृष्ट भएका कृषकहरुलाई सोमबार पुरस्कार प्रदान गरेको छ ।

थाहा नगरपालिका मेयर विष्णुबहादुर विष्टले उत्कृष्ट कृषकहरुलाई नगद पुरस्कार र प्रमाणपत्र प्रदान गरेका हुन् ।
प्रदर्शनीमा करिव १ सय २५ जनाको सहभागिता जनाएको कृषकहरु मध्येबाट २१ कृषकको नतिजा सार्वजनिक गरेको थियो । थाहा नगरपालिकाले सार्वजनिक गरेको प्रदर्शनको नतिजा अनुसार काउली तथा जरे तरकारी बालीतर्फ थाहा २ को सुमित्रा घलानको काउली प्रथम, थाहा ३ को राजकुमार घिसिङको ब्रोकाउली द्वितीय र थाहा १ को अनिता सिन्तानले उत्पादन गरेको मुला तृतीय भएको थियो । फलफूल समूहको तरकारी बालतर्फ थाहा २ को साननानी ढकालले उत्पादन गरेको फर्सी प्रथम, थाहा ६ को थाहा सिङको अकबरे द्वितीय र थाहा ४ को कुमार कार्कीले उत्पादन गरेको लौका तृतीय भएको थियो । कन्दमूल बालीतर्फ थाहा २ को कृष्ण कार्कीले उत्पादन गरेको पिडालु प्रथम, थाहा १२ को देउती माया आलेले उत्पादन गरेको पिडालु द्वितीय र थाहा २ को डोलकुमारी ढकालले उत्पादन गरेको बेसार तृतीय भएको थियो ।

त्यस्तै फलफूल बालीतर्फ थाहा १२ को भक्त बहादुर आले मगरले उत्पादन गरेको एभोकाडो प्रथम, थाहा १२ कै क्षेत्रबहादुर आलेले उत्पादन गरेको सुन्तला द्वितीय र थाहा ६ को मजिरमान महर्जनले उत्पादन गरेको किबी तृतीय भएको थियो । आलु बीउतर्फ थाहा २ को भवानी भमालले उत्पादन गरेको कार्डिनल आलु प्रथम, थाहा ४ को रेशमबहादुर विष्टले उत्पादन गरेको कार्डिनल आलु द्वितीय र थाहा ३ को सानोभाइ खड्काले उत्पादन गरेको मर्मल टप आलुको बीउ तृतीय भएको थियो । अन्न बालीतर्फ थाहा २ को शिवराम कार्कीले उत्पादन गरेको देउती मकै प्रथम, थाहा २ कै पार्वती ढकालले उत्पदन गरेको देउती मकै द्वितीय र थाहा २ की रीता कुमारी थापाले उत्पादन गरेको कोदो तृतीय भएको थियो भने अन्य बालीतर्फ थाहा १२ को दुर्गा बहादुर आले मगरले उत्पादन गरेको कफी प्रथम, थाहा ६ को बाराही मौरी घारको सेरेना गौरी द्वितीय र थाहा १२ कै भक्त बहादुर आले मगरले उत्पादन गरेको कफी तृतीय भएको थियो ।

मेयर विष्टले प्रदर्शनीमा प्रथम, द्वितीय र तृतीय भएका किसानलाई क्रमशः नगद २ हजार, १ हजार ४ सय र १ हजार रुपैयाँ प्रदान गरेका थिए । थाहा नगरपालिका कृषि विकास शाखाको आयोजनामा पुरस्कार वितरण कार्यक्रम भएको हो। कार्यक्रममा थाहा नगरपालिका प्रशासन महाशाखा प्रमुख नविन खालिङ राई, कृषि शाखा प्रमुख सञ्जय तिवारीलगायतको आतिथ्यता रहेको थियो ।