७ वर्षपछि सलिनमानको दमदार कमब्याक: ‘युनिभर्सिटी अफ गुण्डाज्’को स्टाइलिस टिजर सार्वजनिक

२०८० सालको माघमा घोषणा गरिएको फिल्म युनिभर्सिटी अफ गुण्डाज् अन्ततः निर्माणमा जाने पक्का भएको छ। मंगलबार युट्युबमार्फत यसको फर्स्टलुक टिजर सार्वजनिक गर्दै निर्माण टिमले ‘कास्ट एन्ड क्रु’ र कथावस्तुबारे औपचारिक जानकारी गराएको हो।
सार्वजनिक टिजरले एक्सनलाई प्राथमिकतामा राख्दै कलेजभित्र विद्यार्थीबीच हुने गुन्डागर्दीलाई मुख्य विषयवस्तु बनाएको संकेत गर्छ। टिजरमा दुई मुख्य अभिनेता सलिनमान बनियाँ र सलोन बस्नेत कलेज परिसरमै एक ग्याङसँग भिडिरहेका देखिन्छन्। विशेषगरी सलिनमानको एक्सन शैली र लुक्सले कोरियन ड्रामाको झल्को दिने दृश्य प्रस्तुत गरिएको छ।
टिजरमा सलिनको पुनरागमनलाई ‘मौनतापछिको आँधी’ भन्दै ‘स्टाइलिस स्टार’को रूपमा प्रस्तुत गरिएको छ। करिब ७ वर्षपछि उनी यही फिल्ममार्फत ठूलो पर्दामा फर्किन लागेका हुन्। फिल्मको कथा स्वयं सलिनमानकै रहेको जनाइएको छ भने निर्देशन सुरेश न्यौपाने ले गर्नेछन्, जसले यसअघि रंगी निर्देशन गरिसकेका छन्।
मुख्य भूमिकामा सलिन र सलोन नै रहनेछन् भने अन्य कलाकारबारे विस्तृत जानकारी खुलाइएको छैन। तर, निकट स्रोतका अनुसार अभिनेता अनमोल केसी को विशेष भूमिका रहने सम्भावना छ।
फिल्म सान्भी इन्टरटेन्टमेन्ट को ब्यानरमा निर्माण हुने भएको हो। प्राविधिक टिममा रोमन बज्रचार्यको पार्श्व संगीत, सौरभ लामाको छायांकन, बन्दे प्रसादको सम्पादन, मनोज श्रेष्ठको भिएफएक्स तथा राजेन्द्र मोक्तानको रंग संयोजन रहनेछ। पटकथा तथा संवाद मन्दिप गौतमले तयार पारेका हुन्।
निर्माण टिमका अनुसार फिल्मको छायांकन आगामी जेठ महिनाबाट सुरु गरिनेछ।