सिबिआर कार्यक्रम अन्तर्गत अपाङ्गता भएका विद्यार्थीहरुलाई शैक्षिक सामाग्री प्रदान

थाहा नगरपालिकाले लक्षित समुदायका लागि विनियोजित बजेट कार्यान्वयनलाई तीव्रता दिएको जनाएको छ। यसैअन्तर्गत अपाङ्गता भएका विद्यार्थीहरूको शिक्षामा सहयोग पुर्‍याउने उद्देश्यले शैक्षिक सामग्री वितरण गरिएको छ।
थाहा नगरपालिकाले विभिन्न लक्षित समुदायका लागि विनियोजित बजेट कार्यान्वयन सुरु गरेको छ। यसैक्रममा नगरभित्रका विभिन्न विद्यालयमा अध्ययनरत अपाङ्गता भएका बालबालिकालाई शैक्षिक सामग्री वितरण गरिएको छ।
सामुदायमा आधारित पुनर्स्थापना (CBR) कार्यक्रमअन्तर्गत थाहा नगरपालिका महिला, बालबालिका, ज्येष्ठ नागरिक तथा अपाङ्ग परिचयपत्र वितरण शाखा र मकवानपुर अपाङ्ग उत्थान समाज, हेटौंडाको आयोजनामा नगरका २७ वटा विद्यालयमा अध्ययनरत ४५ जना विद्यार्थीलाई झोला, कापी र कलम प्रदान गरिएको हो। बिहीबार विकास घरमा आयोजित कार्यक्रममा सामग्री वितरण गरिएको थियो।
थाहा नगरपालिका सामाजिक विकास समितिको निर्णयअनुसार नगरका २७ वटा विद्यालयमा अध्ययनरत अपाङ्गता भएका विद्यार्थीहरूलाई छात्रवृत्तिसमेत प्रदान गरिएको शाखा प्रमुख प्रतिमा मोक्तानले जानकारी दिनुभयो।
कार्यक्रममा प्रमुख अतिथिका रूपमा बोल्दै थाहा–३ का वडा अध्यक्ष हिरेन्द्रकुमार रायमाझीले भन्नुभयो, “अपाङ्गता भएका बालबालिकाको शिक्षा सुनिश्चित गर्नु स्थानीय सरकारको महत्वपूर्ण जिम्मेवारी हो। उनीहरूलाई आवश्यक शैक्षिक सामग्री र अवसर उपलब्ध गराएर आत्मविश्वासका साथ अघि बढ्ने वातावरण सिर्जना गर्नु हाम्रो साझा दायित्व हो। थाहा नगरपालिका समावेशी र पहुँचयुक्त शिक्षाको पक्षमा निरन्तर प्रतिबद्ध रहनेछ।”
थाहा नगर अपाङ्ग सरोकार समितिका संयोजक मनलाल गोपालीको सभापतित्वमा सम्पन्न कार्यक्रममा मकवानपुर अपाङ्ग उत्थान समाजका अध्यक्ष राम थापा, महिला, बालबालिका तथा अपाङ्ग शाखाकी प्रमुख प्रतिमा मोक्तान, सरस्वती आधारभूत विद्यालयका प्रधानाध्यापक महेन्द्र प्रधान, जनकल्याण माध्यमिक विद्यालयका प्रधानाध्यापक रामकुमार बल लगायत सम्बन्धित विद्यालयका शिक्षक तथा विद्यार्थीहरूको उपस्थिति रहेको थियो।