सिकाइको विकल्प पेश गर्न थाहानगर शिक्षा शाखाको आग्रह

शिक्षा मन्त्रालयले आगामी असार १ गतेदेखि सबै विद्यालयमा सिकाइलाई निरन्तरता दिइने बताइरहँदा थाहा नगरपालिकाको शिक्षा शाखाले सिकाइको उपयुक्त विधि सुझाउन नगरअन्तरगतका सामुदायिक विद्यालयहरुलाई आग्रह गरेको छ । 

शिक्षा शाखाले मंगलबार थाहा नगरपालिकाका सबै सामुदायिक विद्यालयहरुलाई एकै व्यहोराको पत्र लेख्दै तीन दिन भित्र लिखित रुपमा बैकल्पिक शिक्षाका उपायहरुबारे पेश गर्न भनेको छ । 

विश्वका दुई सय बढी देशमा फैलिएको कोरोना भाइरसको महामारीका कारण गरिएको लकडाउनमा विद्यालय तत्काल खुल्न नसक्ने अवस्थामा थाहा नगर शिक्षा शाखाले सिकाइका बैकल्पिक उपायहरु पेश गर्न आह्वान गरेको हो । यसरी विकल्प पेश गर्दा तीनवटा आधारहरुमा निष्कर्षमा पुग्न शिक्षा शाखाले किटानी आधारहरु दिएको छ । 

शिक्षा शाखाका अनुसार विद्यालयहरुले बैकल्पिक उपायहरुबारे निष्कर्षमा पुग्नुअघि विद्यार्थीहरुको प्रविधिमा पहुँचबारे ‘रिसर्च’ गर्नु पर्नेछ । अनुसन्धानको माध्यमबाट विद्यालयहरुले आफ्ना विद्याथीहरुलाई पहिले तीन समूहमा विभाजन गर्नुपर्ने हुन्छ । सबै किसिमका प्रविधिको पहुँचबाट बाहिर रहेका विद्यार्थीहरुलाई एउटा समूहमा राख्नु पर्नेछ भने एफ. एम. रेडियो सुन्न सक्ने वा रेडियो सेट वा रेडियो बज्ने मोबाइल सेट भएका परिवारका विद्यार्थीहरुलाई अर्को समूहमा राख्नु पर्नेछ ।  त्यस्तै इन्टरनेट तथा सूचना संचार प्रविधिको साधनमा पहुँच भएका विद्यार्थीहरुलाई छुट्टै समूहमा राख्नु पर्नेछ । त्यस्ता समूहगत विद्यार्थीहरुको संख्यालाई विद्यालयहरुले शिक्षा शाखामा बुझाउनु पर्ने नगर शिक्षा अधिकारी शोभाकर रेग्मी हस्ताक्षरित पत्रमा जनाइएको छ ।  

विद्यालयहरुलाई पठाइएको पत्रअनुसार एफ. एम. रेडियोमा पहुँच भएका विद्यार्थीहरुका लागि रेडियोबाटै पढाउने विधि उपयुक्त हुन सक्छ । इन्टरनेटमा सहज पहुँच भएका विद्यार्थीहरुको संख्या अधिक भए सोही बैकल्पिक विधि अपनाउने पनि शिक्षा शाखाले संकेत गरेको छ । इन्टरनेट र संचारप्रविधिको साधनमा पहुँचमा भएका विद्यार्थीहरुका लागि जुम एप, गुगल मिट, फेसबुक ग्रुपबाट पढाउन सकिन्छ तर यो समूहका विद्यार्थीहरुमा रेडियोको सहजै पहुँच हुने भएकोले एफ. एम. रेडियो नै उत्तम विकल्प हुन सक्ने पनि जानकारहरुको ठम्याई छ । 

कुनै पनि प्रविधिमा पहुँच नभएका विद्याथीहरुका लागि भने विद्यालयहरुले सुरक्षा सामग्रीको प्रयोगसँगै सामाजिक दूरी कायम गरेर कक्षा संचालन गर्ने सम्भावनाबारे विकल्प दिनु पर्नेछ । त्यस्ता विद्यार्थीहरुका लागि घुम्ती कक्षा संचालनको सम्भावनाबारे  खुलाउन पनि शिक्षा शाखाले पत्रमा भनेको छ । 
बैकल्पिक प्रणालीबाट विद्यार्थीको सिकाई सहजीकरण निर्देशिका, २०७७ अनुसार शिक्षा शाखाले सामुदायिक विद्यालयहरुलाई पत्राचार गरेको हो ।