वर्ल्डलिङ्कलाई २ विधामा ‘एसियन टेलिकम अवार्ड’

नेपालको सबैभन्दा ठुलो इन्टरनेट सेवाप्रदायक वर्ल्डलिंक कम्युनिकेसन्सले दुई विधामा एसियन टेलिकम अवार्ड २०२५ प्राप्त गरेको छ ।
एसियन टेलिकम नामक संस्थाले गत २० फेब्रुअरीमा गरेको कार्यक्रममा वर्ल्डलिंकलाई ‘ब्रोडब्यान्ड टेलिकम कम्पनी अफ द इयर’ र ‘कस्टमर सर्भिस इनिसिएटिभ अफ द इयर’ अवार्ड प्रदान गरिएको हो ।
आयोजकका अनुसार ‘एसियन टेलिकम अवार्ड’ एसिया-प्रशान्त क्षेत्रका प्रमुख टेलिकम कम्पनीहरू र डिजिटल क्षेत्रका नवप्रवर्तकहरूलाई सम्मानित गर्ने एक महत्त्वपूर्ण कार्यक्रम हो । सो अवसरमा नेपालको वर्ल्डलिंकले दूरसञ्चार क्षेत्रमा पुर्‍याएको योगदानलाई कदर गरिएको थियो ।
ग्राहक संख्याको आधारमा वर्ल्डलिंक नेपालकै ठुलो इन्टरनेट सेवाप्रदायक हो । नियामक नेपाल दूरसञ्चार प्राधिकरणको गत माघ महिनाको एमआईएस रिपोर्ट अनुसार वर्ल्डलिंकका नौ लाख ७२ हजार बढी ग्राहक छन् । कम्पनीले पछिल्लो एक वर्षमा मात्रै ९७ हजार ९१९ नयाँ ग्राहक थपेको छ ।
यस वर्षको ‘एसियन टेलिकम अवार्ड’ मा विभिन्न देशका कम्पनीले अवार्ड प्राप्त गरेका थिए । जसअन्तर्गत ‘साइबर सुरक्षा इनिसिएटिभ’, ‘आर्टिफिसियल इन्टेलिजेन्स इनिसिएटिभ’, 'इन्फ्रास्ट्रक्चर इनिसिएटिभ' लगायतका विधा समावेश थिए ।