मापदण्डभित्र रहेकालाई मात्र ढुंगा गिट्टी बालुवाको उत्खनन् गर्न अनुमति दिइने

जिल्ला समन्वय समिति मकवानपुरले जिल्लामा स्थापित ढुंगा गिट्टी बालुवाको उत्खनन् कार्यलाई ऐन कानूनको मापदण्डभित्र प्रयोग गर्नेलाई मात्र संचालनको लागि अनुमति दिने निर्णय गरेको छ ।

अनुगमन गर्न र जिल्लाका सर्वसाधारण नागरिकको निजी आवास गृह र विकास निर्माणका पूर्वाधार निर्माणका लागि आवश्यक गिट्टी बालुवा सहज ढंगबाट आफूर्ति गर्न स्थानीय पदाधिकारीहरुलाई सजगताका साथ अनुगमनमा पठाउने र थप मार्गनिर्देशनको लागि संघीय सरकारलाई अनुरोध गर्ने निर्णय भएको जिल्ला समन्वय समिति मकवानपुरले जनाएको छ ।

समितिको आज बसेको बैठकले जिल्लामा रहेको सरकारी प्रति जग्गा, सार्वजनिक चौतारा, गौचरण र पानी घाट र सार्वजनिक जग्गाहरुलाई संघीय सरकारको मार्ग निर्देशन प्राप्त भए बमोजिम स्थानीय निकायले ऐन कानूनको परिधीभित्र रहेर जग्गाको रेखदेख र स्वामित्व ग्रहण गर्न अधिकार प्राप्त भए बमोजिम अब आ– आफ्नो कार्यक्षेत्र विस्तार गर्नेसमेत निर्णय गरेको छ ।

त्यसैगरी मकवानपुरका १० वटै स्थानीय तहका कोभिड – १९ का संक्रमित विरामीहरुलाई तत्काल भइरहेको आइशोलेशन कक्षबाट उपचार सेवाको तत्काल भइरहेको प्रगतीको समिक्षा गरिनुको साथै कोरोना संक्रमित विरामीहरुलाई थप उपचारमा सेवा पुर्याउन स्थानीय गाउँपालिका र नगरपालिकाहरुले थप आइशोलेसन कक्षको स्थापना गर्ने र वडा – वडामा पिसिआर प्रविधिबाट कोरोना परीक्षण गर्ने दर बढाउँदै लैजाने निर्णय गरिएको पनि जिल्ला समन्वय समिति मकवानपुरका प्रमुख रघुनाथ खुलालले जानकारी दिए ।

बैठकमा मकवानपुरका १० वटै स्थानीय तहका प्रमुख, उपप्रमुखहरुको उपस्थिति रहेको जिल्ला समन्वय समिति मकवानपुरले जनाएको छ ।