बझाङमा भुकम्पका कारण जिल्लाका १२ हजार ३४ वटा घर तथा भवनमा क्षति

 बझाङमा केन्द्रबिन्दु बनाई मंगलबारदेखि पटक पटक गएको भुकम्पका कारण जिल्लाका १२ हजार ३४ वटा घर तथा भवनमा  क्षति भएको छ । जिल्ला बिपद ब्यवस्थापन समितिले जिल्लाका १२ वटै पालिकाबाट बिवरण प्राप्त गरेअनुसार पूर्ण, आंशिक र सामान्य क्षति भएका ११ हजार ७७० घर तथा भवन क्षति भएको बिवरण प्राप्त गरेको छ ।  

भुकम्पका कारण सबैभन्दा बढी निजी घरहरु २ हजार ११९ पूर्णक्षति, ६ हजार १८३ आंशिक क्षति र ३ हजार ४ सय ६८ घर आंशिक क्षति भएका छन् । त्यसका साथै सरकारी भवन तथा कार्यालयतर्फ पूर्णक्षति ११७ वटा भवन र आंशिक क्षति १४७ रहेको जिल्ला बिपद ब्यवस्थापन समितिको अभिलेखमा उल्लेख छ  । 

त्यसका साथै जिल्लाभरी चौपायातर्फ ६ वटाको मृत्यु ३ घाइते रहेका छन् । यसका साथै अन्य क्षतितर्फ जलबिद्युत, शौचालय, सामुदायिक भवनतर्फ ५० वटाको क्षति भएको समेत सो अभिलेखमा उल्लेख छ । 

मंगलबारसम्म जिल्लाका ११ वटा स्थानीय तहहरुले क्षतिको सबै बिवरण जिल्ला बिपद ब्यवस्थपन समिति तथा जिल्ला प्रशासन कार्यालयमा बुझाइसकेको छ । सुर्मा गाउँपालिकाको मात्र बिवरण आउन बाँकी रहेको जिल्ला बिपद ब्यवस्थापन समितिका फोकलपर्सन नन्द धामीले जानकारी दिनुभयो । 

सुर्मा गाउँपालिकाको बिवरण आएपछि केही संख्या बढ्न सक्ने बताइएको छ । भुकम्पबाट क्षति भएका घरपरिवार र सरकारी निकायलाई प्रारम्भिक चरणमा राहत उपलब्ध गराउन स्थानीयको समन्वयमा बिभिन्न गैरसरकारी संस्थाले पनि राहत बितरण गर्ने काम गरिरहेका छन् । जिल्ला बिपद ब्यवस्थापन समितिको निर्णयअनुसार खप्तडछान्ना गाउँपालिकामा प्लान इन्टरनेशनल, केदारस्यँु गाउँपालिकामा वल्र्डभिजन इन्टरनेशनल, दुर्गाथली गाउँपालिकामा युनिसेफ, तल्कोट, छबिसपाथीभेरा, बित्थडचिर र साइपाल गाउँपालिकामा नेपाल रेडकक्रसले राहत बितरण गर्ने निर्णय गरिएको छ । 

यसका साथै मष्टा गाउँपालिका र जयपृथ्बी नगरपालिकामा युएनएफपीए, थलारा गाउँपालिकामा युनसेप र युएमएनले राहत दिने भएको छ । साथै जयपृथ्बी नगरपालिकाका केही वडामा वल्र्ड भिजन र सेभ द चिल्डेनले राहत बितरण गर्ने सहमती भएको छ ।  बुंगल नगरपालिकामा निड्स नेपालले राहत बितरण गर्ने निर्णय भएको पनि प्रमुख जिल्ला अधिकारी नारायण पाण्डेले जानकारी दिनुभयो । 

पीडित परिवारलाई नगद तथा राहत सामग्री दिने अन्य संस्था तथा ब्यक्तिले जिल्ला बिपद ब्यवस्थापन समिति तथा स्थानीय तहको समन्वयमा दिनुपर्ने समेत निर्णय गरिएको छ । भुकम्प पीडितलाई राहत उपलब्ध गराउँदा दोहोरोपन नहोस् र पीडितले राहतबाट बन्चित नहुन् भनेर एकद्घार प्रणाली अपन्याएको पनि प्रजिअ पाण्डेले जानकारी दिनुभयो । 

अहिले जिल्लाभरि राहत बितरणका लागि स्थानीय तहका साथै बिभिन्न राष्ट्रिय तथा अन्तर्राष्ट्रिय गैर सरकारी संस्थाहरु राहत सामग्री लिएर प्रभावित क्षेत्रमा परिचालित भएका  छन् । भुकम्पले सबैभन्दा बढी जयपृथ्बी नगपालिका, मष्टा गाउँपालिका, थलारा गाउँपालिका, खप्तडछान्ना गाउँपालिका, केदारस्युँ गाउँपालिका, दुर्गाथली गाउँपालिका, छबिसपाथीभेरा गाउँपालिका, बुंगल नगरपालिका, तल्कोट गाउँपालिका, साइपाल गाउँपालिका र सुर्मा गाउँपालिकामा क्षति गरेको छ । 

प्रारम्भिक राहत सामग्रीमा त्रिपाल, टेन्ट, पिफम, कम्वललगायतका सरसफाइ सामग्रीहरु रहेका छन् । भुकम्पमा परी एकजनाको मृत्यु र २० जना घाइते भएका छन् ।