प्रेस सेन्टर मकवानपुरले उपलब्ध गरायो पत्रकार सुनिता बिष्ट लाई सुत्केरी भत्ता ।

हेटौंडा । प्रेस सेन्टर नेपाल मकवानपुरले देशमै पहिलोपटक पत्रकार महिलालाई सुत्केरी भत्ता उपलब्ध गराएको छ । सेन्टरको पुष १० गते बसेको पहिलो पूणर् बैठकले महिला पत्रकारलाई सुत्केरी भत्ता उपलब्ध गराउने निणर्यबमोजिम मंगलबार पत्रकार सुनिता विष्टलाई सुत्केरी भत्ता उपलब्ध गराएको हो । 
सेन्टर मकवानपुरका अध्यक्ष अञ्जली थापाले विष्टलाई नगद पाँच हजार रुपैयाँ उपलब्ध गराएकी हुन् । नगद उपलब्ध गराउदै अध्यक्ष थापाले निरन्तर पत्रकारीतामा लागेका महिलाहरुलाई सुत्केरी अवस्थामा प्रोत्साहनस्वरुप भत्ता वितरण गरिएको बताए । उनले नेपालमा अहिलेसम्म पत्रकार महिलालाई  प्रोत्साहनका रुपमा कुनै कार्यक्रमहरु नगरिएकाले सेन्टरको मकवानपुर शाखाबाटै यस कार्यक्रमको शुभारम्भ गर्नु पाउँदा आफुलाई गर्वान्वित महसुस भएको बताए । 
कार्यक्रममा नेपाल पत्रकार महासंघ बागमती प्रदेशका महासचिब कृष्ण सारु मगरले प्रेस सेन्टरको पत्रकार महिलालाई प्रदान गरिएको सुत्केरी भत्ताले आगामी दिनमा पत्रकारीतामा निरन्तर क्रियाशिल रहन महिला पत्रकारलाई प्रेरणा मिल्ने जिकिर गरे । 
यसैबिच, नेपाल पत्रकार महासंघ मकवानपुरको टोलीले मंगलबारै पत्रकार सुनिता विष्टलाई भेट गरेका छन् । अध्यक्ष मणिराज गौतम नेतृत्वमा गएको टोलीले सुत्केरी भएर बसेकी पत्रकार विष्टलाई पोषिलो खानेकुरा प्रदान गरेको छ । अध्यक्ष गौतमले पत्रकार विष्ट र छोरीको सुस्वास्थ्यको कामना गर्दै आगामी दिनमा महिला पत्रकारहरुलाई प्रोत्साहन गर्न थप कार्ययोजना ल्याउने जानकारी दिए । 
यस्तै, सोही दिन सञ्चारिका समूहले पनि पोषिलो खानेकुरासहित पत्रकार विष्टलाई भेट गरेका छन् । समूहका अध्यक्ष सम्झना रिजाल नेतृत्वको टिमले भेट गरी आमा र बच्चाको सुस्वास्थ्यको कामना गरेको छ । 
कार्यक्रममा पत्रकार महासंघका तर्फबाट उपाध्यक्ष सरला अधिकारी, सहसचिव एमपी शर्मा, सदस्यहरु रुपा गुरुङ, अर्जुन सञ्जेल, सृजना नेपाल लगायतको सहभागिता रहेको थियो । पत्रकार विष्ट बिगत दुईबर्षदेखि मकवानपुरलाई कर्मथलो बनाएर पत्रकारीतामा क्रियाशिल रहेकी छिन् । उनले दोस्रो सन्तानका रुपमा छोरीलाई २७ दिनअघि जन्म दिएकी हुन् ।