प्रेस सेन्टरले चार पत्रकार पुरस्कृत गर्ने।

प्रेस सेन्टर, नेपालले कृष्णसेन ‘इच्छुक’ स्मृति पत्रकारिता पुरस्कार २०७८/७९ बाट दुई जनालाई जनही ५० हजार र शक्ति–तारा स्मृति पत्रकारिता पुरस्कार ०७८/ ७९ बाट दुई जनालाई जनही २५ हजार रुपियाँसहित कदरपत्र प्रदान गर्ने निर्णय गरेको छ ।
आइतबार साँझ बसेको प्रेस सेन्टर, नेपालको सचिवालयको बैठकले सोको लागि नेपाल पत्रकार महासङ्घका महासचिव रोशन पुरीको अध्यक्षतामा गोविन्द देवकोटा र गङ्गा बरालको तीन सदस्यीय निर्णायक समिति गठन गरेको छ ।
वि.सं २०५९ जेठ १३ गते माओवादी ‘जनयुद्ध’को दौरानमा मारिएका पत्रकार तथा सांस्कृतिककर्मी कृष्ण सेन ‘इच्छुक’को जेठ १३ गते एक कार्यक्रमकाबीच सो पुरस्कार वितरण गरिनेछ ।
बैठकमा सम्बोधन गर्दै पत्रकार र सांस्कृतिकर्मीको त्याग, तपस्या र बलिदानमा बनेको सङ्घीयतासहितको अधिकार सुनिश्चित गर्नकाा लागि बनेको सत्तापक्षीय गठबन्धनको ऐतिहासिक विजय भएको नेपाल कम्युनिष्ट पार्टी (माओवादी केन्द्र) का केन्द्रीय सदस्य महेश्वर दाहालले बताए ।
यस्तै, प्रेस सेन्टर नेपालका अध्यक्ष विष्णु सापकोटा ‘जुगल’ले पत्रकारिता पेशा छाडेर स्थानीय पालिकामा विजयी हुनुभएका प्रमुख र अध्यक्षहरुलाई अधिकतम जनताको पीडा र अभावबारे जानकार भएकाले जनजीविका, स्थानीय विकास, कुशासन र भष्ट्राचारमुक्त समाज निर्माण गर्न आह्वान गरे ।