पालुङमा ऐतिहासिक तीन बर्षको इन्द्रायणी माइको जात्रा सुरु,

मकवानपुर उत्तरी क्षेत्रमा पर्नेे थाहा नगरपालिकामा इन्द्रायणी माईको जात्रा सुरु भएको छ । बिहीबार (आज) बाट सुरु भएको जात्रामा भगवान गणेश, इन्द्रायणी, कुमारी र कालाभैरबको रथ इन्द्रायणी मन्दीरमा ल्याइएको हो । थाहा–२ देउला गाउँमा राखिएको भगवानको मुर्तिलाई पालुङ हिटीसम्म ल्याएर रथमा राखेर इन्द्रायणी मन्दीरमा ल्याइएको हो । यस्तै, आजै शिखरकोटबाट पनि गणेशको रथ जात्रा स्थलका रहेको इन्द्रायणी मन्दीरमा लगिएको थियो ।

तीन वर्षमा लाग्ने मकवानपुरकै ऐतिहासिक जात्रा नेवार समुदाय र देउला समुदायले मिलेर बनाउने गर्दछन् । देउला गाउँमा राखिएको मुर्ति लिन नेवार समुदायको इन्द्रायणी भगवती कालभैरव गुठीका गुठियारहरु बाजागाजा सहित देउला गाउँ पुग्छन् । देउला गाउँका पुजारीहरुले काम्दै भगवानलाई मञ्जुर बनाएपछि पूजाआरधना गरेर पालुङ डबलीमा ल्याइन्छ । सो पश्चात् रथमा राखेर थाहा–३ मा रहेको इन्द्रायणी माईको मन्दीरमा रथ पुर्याउने प्रचलन छ ।

रथ लैजाने र पूजाको विधिमा मुख्यगरी यी दुई समुदायको भूमिका रहने भए पनि यो जात्रा मकवानपुरै ऐतिहासिक धरोहरको रुपमा परिचित छ । इन्द्रायणी भगवती कालभैरव गुठी समितिका अध्यक्ष श्याम भक्त श्रेष्ठका अनुसार यो जात्रा ३५० वर्ष पुरानो इतिहाससँग जोडिएको छ । आफ्ना पुर्खाहरुले मनाउँदै आएको जात्रालाई आफूहरुले पनि निरन्तरता दिएको उनले बताए ।

मेलाको पहिलो दिन इन्द्रायणी चौरमा रहेको इन्द्रायणी मन्दिरमा रथ ल्याएसँगै पूजाको विधि सुरु भएको हो । जात्राको दोस्रो दिन सर्वसाधारणको मुख्य पुजा गर्नेछन् भने तेस्रो दिन रथ उठाउने, प्रसाद वितरण गर्ने तथा पुजारीहरुले तान्त्रिक विधि सहितको पूजा गर्ने अध्यक्ष श्रेष्ठको भनाइ छ ।

इन्द्रायणी, भगवती कालाभैरब गुठी संरक्षण समितिले रातभर होमसहितको पुजा सञ्चालन गर्दछन् । गुठीको पुजा पनि रातमै हुने गर्दछ । मन्दिरमा राती पञ्चबली सहितको पुजा हुने गर्दछ । तीन दिनसम्म लाग्ने जात्राको व्यवस्थापन समितिले गर्ने अध्यक्ष श्रेष्ठले बताए ।