नेपाल उद्योग बाणिज्य महासंघकाे निर्वाचनमा थाहानगरकाे उमेदवारी

नेपाल उद्योग बाणिज्य महासंघको केन्द्रीय नेतृत्वका लागि थाहा नगर उद्योग बाणिज्य संघले उमेदवार सिफारिस गरेकाे छ । दुई वर्षअघि मात्र महासंघकाे सदस्यता पाएकाे  थाहा नगरले महासंघको यही मंसिरमा हुने निर्वाचनका लागि  राजकुमार न्यौपानेलाई  केन्द्रीय सदस्यतर्फ उम्मेदवारकाे टिकट दिएकाे हाे । 

लामो समयको रस्साकस्सीपछि मकवानपुर उद्योग बाणिज्य संघले अरुणराज सुमार्गीलाई केन्द्रीय सदस्यको रुपमा उम्मेदवार बनाएपछि न्यौपानेले थाहा नगरबाट टिकट लिनुभएकाे हाे । महासंघको केन्द्रीय नेतृत्वको उम्मेदवार बन्नका लागि जिल्ला वा नगरबाट अनिवार्य सिफारिस आवश्यकता पर्दछ ।

जिल्ला तथा नगर, वस्तुगत र एसोसिएटतर्फबाट केन्द्रीय सदस्य पदका आकांक्षीहरूले उम्मेदवारी दर्ता गराइसकेका छन् । महासंघको ५४औं वार्षिक साधारणसभा तथा कार्यकारिणी समितिको निर्वाचन मंसिर ११ र १२ र वार्षिक साधारणसभा तथा १३ गते निर्वाचन हुँदैछ । गत चैतमा हुनुपर्ने महासंघको साधारणसभा तथा निर्वाचन कोभिड–१९ का कारण स्थगन भएको थियो ।

न्यौपानेले आफ्नो जित सुनिश्चित रहेको दावी गर्नुभएकाे छ  । उहाँले आफू चन्द्रप्रकाश ढकाल पक्षको चुनावी अभियानमा रहेको बताउनुभयाे । उहाँका अनुसार प्रदेशतर्फ १६ मत रहेको छ । ‘उम्मेदवारी दर्ता भइसकेको छ । अन्तिम नामावली प्रकाशन मंसिर ५ गते हुनेछ ।’, उहाँले आफू अध्यक्ष भइसकेको शाखाले निषेधको राजनीति गरेको भएपनि उम्मेदवार बनेको र आफ्नो जितलाई कसैले रोक्न नसक्ने बताउनुभयाे ।