दामन–नयाँगाउँ खानेपानी परियोजनाको अनुगमन

थाहा नगरपालिका वडा नम्बर ४ मा निर्माणाधिन दामन–नयाँगाउँ खानेपानी परियोजनाको अनुगमन गरिएको छ । मकवानपुरको थाहा नगरपालिका वडा नम्बर ४ मा दुईवटा स्किममा काम गर्ने गरी विकास साझेदार संस्था च्वाइस नेपालको सहयोगमा खानेपानी परियोजनाको निर्माण भइरहेको छ ।
पर्यटकीय क्षेत्र दामन–नयाँगाउँ क्षेत्रमा खानेपानीको अभाव बढ्दै गएपछि च्वाइस नेपालको सहयोगमा योजनाको निर्माण कार्य थालिएको थियो । खानेपानी आयोजना अनुगमन कार्यक्रममा च्वाइस नेपालका कार्यकारी निर्देशक प्रतीक शर्मा, च्वाइस नेपालका प्रताप घिमिरे, ऋषेश्वर/छ्युमिग झ्याङछुप क्षेत्र विकास समितिका अध्यक्ष बिनोद लामा, उपभोक्ता समितिका पदाअधिकारीहरुलगायतको उपस्थिती रहेको थियो ।
परियोजना अन्तर्गत दामन स्किममा ३० हजार लिटरको रिजर्भ ट्याङ्की तथा इन्टेक निर्माण हुनेछ । नयाँगाउँ स्किममा इन्टेकसहित ३० हजार लिटरको एउटा र अर्को १० हजार लिटरको रिजर्भ ट्याङ्की निर्माण हुने च्वाइस नेपालका प्राविधिक सुभाष मरहट्टाले जानकारी दिए । लाभग्राही क्षेत्रभन्दा मुहान टाढा भएकोले योजनाको लागत अनुमान करिब ७० लाख पुगेको प्राविधिक मरहट्टाले जानकारी दिए । परियोजना अन्तर्गत दामनमा ३२ र नयाँगाउँमा ४१ परिवारका लागि ‘एक घर, एक धारा’ निर्माण हुने च्वाइस नेपालका प्रताप घिमिरेले जानकारी दिए ।
योजना अनुगमनको क्रममा च्वाइस नेपालका कार्यकारी निर्देशक प्रतीक शर्माले नगरपालिकाको माग र उपभोक्ताहरुको सक्रियतामा योजना सम्पन्नतर्फ उन्मुख भएकोमा खुशी व्यक्त गरे । वास्तविक आवश्यक भएको क्षेत्रमा परियोजना सञ्चालन गर्दा नागरिकले भरपूर लाभ लिने शर्माले उल्लेख गरे । लामो समयदेखि थाहा नगरपालिकासँगको साझेदारीमा भएको कामहरु नागरिकले महशुस गर्ने किसिमको विकास भएको शर्माले प्रतिक्रिया दिए । योजना सम्पन्न पश्चात् थाहा खानेपानी तथा सरसफाई व्यवस्थापन बोर्ड मार्फत सञ्चालन व्यवस्थापन हुने थाहा नगरपालिकाले जनाएको छ ।
च्वाइस नेपाल थाहा नगरपालिकासँग लामो समयसम्म सहकार्य गर्ने संस्थाको रुपमा स्थापित भएको छ । थाहा नगरपालिका र च्वाइस नेपालबीच सन् २०१५ देखि सहकार्य हुँदै शिक्षा, स्वास्थ्य, खानेपानी क्षेत्रमा सहकार्य हुँदै कार्यक्रमहरु सञ्चालन भैरहेको छ ।