दामनमा एक हप्ते युवा नेतृत्व प्रशिक्षण सुरु, ‘आरोग्य थाहा नगर’ अभियानलाई टेवा

थाहा नगर  — ‘आरोग्य थाहा नगर’ निर्माण गर्ने उद्देश्यसहित द आर्ट अफ लिभिङको आयोजना तथा थाहा नगरपालिका र इलाका प्रहरी कार्यालय पालुङको सहकार्यमा दामनस्थित गौरीशंकर होटलमा एक हप्ते युवा नेतृत्व प्रशिक्षण कार्यक्रम सुरु भएको छ।
अध्यात्मिकता र व्यवहारिक ज्ञानको समन्वयमार्फत युवाहरूलाई आफ्नो जीवन र समाजमा सकारात्मक परिवर्तन ल्याउन सक्षम बनाउने उद्देश्यले ८ दिने आवासीय प्रशिक्षण कार्यक्रम सञ्चालन गरिएको आयोजकले जनाएको छ। कार्यक्रममा ४० जना युवाहरूको सहभागिता रहेको छ।
प्रशिक्षणमा द आर्ट अफ लिभिङका ब्रह्मचारी श्रीचैतन्य जीसहित प्रशिक्षकहरू दमयन्ती रायमाझी, डा. आस्था पुडासैनी र उदय खड्गीले ध्यान, योग, श्वास–प्रश्वास तथा जीवन कौशलसम्बन्धी व्यावहारिक ज्ञान प्रदान गर्नेछन्।
कार्यक्रमको उद्घाटन गर्दै थाहा नगरपालिकाका उपप्रमुख भरत गोपालीले पछिल्लो समय बढ्दो मानसिक तनाव र असन्तुलित जीवनशैलीका कारण समाजमा मानसिक समस्या तीव्र रूपमा बढ्दै गएको उल्लेख गरे। उनले ‘जीवन जिउने कला’ सम्बन्धी प्रशिक्षण हरेक नागरिकका लागि आवश्यक भएको बताए।
“आत्मिक शान्ति, सकारात्मक सोच र जीवनप्रति सन्तुलित दृष्टिकोण विकास गर्न यस्तो प्रशिक्षण अत्यन्त महत्त्वपूर्ण छ,” उनले भने, “यस प्रकारका कार्यक्रमले ‘आरोग्य थाहा नगर’ अभियानलाई थप सशक्त बनाउनेछन्।”
द आर्ट अफ लिभिङका श्रीचैतन्य जीले ध्यान, योग र श्वास–प्रश्वाससम्बन्धी अभ्यासमार्फत मानव जीवनमा देखिएको तनाव घटाई समाजमा सकारात्मकता र मुस्कान फैलाउने लक्ष्य रहेको बताए।
त्यसैगरी, थाहा नगर उद्योग वाणिज्य संघका अध्यक्ष पुरुषोत्तम ढकालले समाजमा संस्कार र संस्कृतिको क्षयीकरण भइरहेका बेला आर्ट अफ लिभिङ जस्ता संस्थाको भूमिका महत्वपूर्ण हुने धारणा राखे।
कार्यक्रममा थाहा नगरपालिका वडा नं. ४ का अध्यक्ष नारायण लामा, ईलाका प्रहरी कार्यालय पालुङका प्रमुख रुक्सा बज्राचार्य ,सञ्चारकर्मी शम्भु अधिकारी लगायतको उपस्थिति रहेको थियो।