थाहा नगरपालिका कोरोना कहरमा खाद्यान्नको लेखाजोखा गर्दै

नयाँ भेरियन्टसहितको कोरोनाको दोस्रो लहर चर्किँदै जाँदा मकवानपुरको थाहा नगरपालिकाले नगरभित्र रहेको खाद्यान्नको दैनिक लेखाजोखा शुरु गरेको छ । नगरपालिकाले बजारमा खाद्यान्नको सञ्चिति अवस्थाको प्रत्यक्ष अनुगमन गरी सोको विवरण दैनिक रुपमा प्रकाशनसमेत गर्न थालेको छ । 
जिल्ला प्रशासन कार्यालय मकवानपुरले आगामी वैशाख ३१ गतेसम्म निषेधाज्ञा जारी गरेको र त्यसपछि पनि थपिने सम्भावना रहेकोले निकट भविष्यमा नगरको जनसङ्ख्यालाई धान्न सक्ने खाद्यान्नको लेखाजोखा शुरु गरिएको थाहा नगरपालिकाका प्रमुख लवशेर विष्टले बताउनु भयो । हाल थाहा नगरपालिकाको जनसङ्ख्या करिब ५० हजार रहेको छ । 
कोरोना संक्रमणका कारण थाहा नगरपालिकासहित मकवानपुरको चार स्थानीय तहमा निषेधाज्ञा जारी भए पनि निषेधाज्ञामा खाद्यान्नसहित अत्यावश्यकीय सामान ढुवानी गर्न छुट दिइएको छ । तर, यही मौका छोपेर व्यापारीहरुले कालोबजारी गर्ने र कृत्रिम अभावको सिर्जना गर्न सक्ने देखेर बजारमा खाद्यान्नको अवस्थाबारे अनुगमन गरिएको नगर प्रमुख विष्टको भनाइ छ । 
हाल थाहा नगरपालिकाको मुख्य बजारमा चामल(सोना) १०९४ बोरा, चामल(जिरा)२१२८ बोरा, दाल(मास)५६ बोरा, दाल(मसुरो) १३० बोरा, तेल(तोरी) ५४ कार्टुन, तेल(भटमास) ३०८८ कार्टुन र चिनी ९९ बोरा रहेको थाहा नगरपालिकाले जनाएको छ । ‘अहिले बजारमा खाद्यान्नको अभाव छैन, किनेर खान नपाइने अवस्था आएमा नागरिकहरुले जुनसुकै बेला हामीलाई गनासो गर्न सक्छन् । हामी किन्ने ठाउँ देखाइदिन्छौं,’ नगरपालिकाका सामाजिक विकास शाखा प्रमुख अनिल लामिछानेले भन्नुभयो ।