थाहा नगरपालिकाले कोभिड पहिचान र नियन्त्रणमा भएका आम्दानी र खर्च सार्वजनिक गर्ने

कोरोना संक्रमणको दोस्रो चरणको क्रममा थाहानगर पालिकामा भएका अनम्दानी र खर्चको विवरण छिट्टै सार्वजनिक गर्ने तयारी गरिएका । नगरमा केही दिनपछि दैनिक रुपले कोभिड पहिचान र नियन्त्रणमा भएका आम्दानी र खर्च विवरण सार्वजनिक गर्ने तयारी गरिरहेको स्वास्थ्य शाखा प्रमुख मेघराज बलामीले बताउनु भयो । उहाँका अनुसार नगरपालिकाको वेबसाईट thahamun.gov.np  मा गर्ने तयारीमा रहेको छ ।

हाल दैनिक रुपले न्यूनतम ४र५ सेट पिपिई सेट, एन्टिजेन, भिटिएम, सेनिटाइजर, मास्क, फेस शिल्ड, पन्जा, साबुन, अक्सिजन लगायतका स्वास्थ्य सामग्री प्रयोगमा आई खर्च हुने गरेको समेत बलामीले बताउनु भयो । हाल नगर आफैले खरिद गरेका र विभिन्न निकायहरुबाट नगरमा प्राप्त स्वास्थ्य सामाग्रीहरु अग्र पङ्क्तिमा खटिने क्षेत्रहरुमा गरिएको छ । बलामीका अनुसार हालसम्म सबै वडा कार्यालय, वडा स्तरमा गठित समिति, प्रहरी, स्वास्थ्य केन्द्र तथा स्वास्थ्य चौकीहरुका वितरण गरिदै आएको छ ।

थाहानगरमा पछिल्लो समय बिपन्न परिवारलाई वडा कार्यालयको सिफारिसमा निःशुल्क एम्बुलेन्स, औषधिको सुविधा दिदै आएको छ भने अन्य कोरोना संक्रमित बिरामी नगरभित्रका स्वास्थ्य संस्थाहरुमा ओसारपसार गर्दा भाडामा ५० प्रतिशत छुट दिइदै आएको छ । नगरपालिकाले आइसोलेसनको तयारी, स्वास्थ्यकर्मीहरुलाई थप भत्ता, अक्सिजन, एम्बुलेन्स, औषधि, स्वास्थ्य सामग्रीलगायतमा खर्च गरिदै आएको छ ।

हिजो आईतबार सम्ममा थाहानगरमा ५ सय ३६ जना संक्रमित भई ५५ जना निको भएका छन् । यो अवधिमा ६ जनाको मृत्यु भएको छभने १७ जनाको थाहा नगरपालिका बाहिरका विभिन्न अस्पतालहरुमा उपचार भैरहेको छ । ८ जना बज्रबाराही आइसोलेसनमा छन् । ४ सय ५० जना होम आइसोलेसनमा छन् ।