थाहा नगरपालिकालाई संघको बजेट ४० करोड २१ लाख

संघीय सरकारले थाहा नगरपालिकाका लागि आगामी आर्थिक वर्ष २०७७।०७८को लागि ४० करोड २१ लाख बजेट विनियोजन गरेको छ । अर्थमन्त्री डा. युवराज खतिवडाले विहीबार प्रस्तुत गरेको बजेटअन्तर्गत थाहा नगरपालिकाको लागि यो रकम विनियोजन भएको हो । 

संघीय सरकारले विनियोजन गरेको बजेटअन्तर्गत मकवानपुरलाई ३ अर्ब ७७ करोड ९९ लाख रुपियाँ परेको छ । यसमध्ये थाहा नगरपालिकाको लागि समानीकरण तर्फ १३ करोड ६ लाख, सशर्त अनुदान तर्फ २५ करोड १५ लाख र समपुरक अनुदान २ करोड गरी ४० करोड २१ लाख रुपियाँ परेको हो । 

थाहा नगरपालिकाको लागि अर्थ मन्त्रालयले विनियोजन गरेको यो रकम जिल्लाका १० स्थानीय तहमध्ये दोस्रो ठूलो बजेट हो । बजेटअनुसार हेटौंडा उपमहानगरपालिकाको लागि सबै भन्दा धेरै ९८ करोड ८९ लाख विनियोजन भएको छ भने सबै भन्दा थोरै बजेट ईन्द्रसरोबर गाउँपालिकाको लागि २१ करोड ६ लाख विनियोजन भएको छ ।

त्यसैगरी बकैया गाउँपालिकाका लागि ३८ करोड ८८ लाख, बागमती गाउँपालिकाका लागि ३० करोड ७८ लाख, मकवानपुरगढी गाउँपालिकाका लागि ३२ करोड ५९ लाख, भीमफेदी गाउँपालिकाका लागि ३० करोड ८७ लाख र कैलाश गाउँपालिकाका लागि २५ करोड ७४ लाख रुपियाँ विनियोजन भएको छ । 

त्यसैगरी मनहरी गाउँपालिकाका लागि ३० करोड ९९ लाख र राक्सिराङ गाउँपालिकाका लागि २७ करोड ९७ लाख बजेट विनियोजन गरेको छ ।