थाहा नगरपालिकाको न्यायीक समिति द्वारा १२ वटै वडामा सचेतना प्रदान

थाहा नगरपालिका न्यायिक समितिले न्यायिक सचेतना कार्यक्रम नगरका सम्पुर्ण १२ वटै वडामा प्रदान गरेको छ ।

थाहा नगरपालिकाका न्यायिक समितिका संयोजक एवं उप प्रमुख भरत गोपालीले समाजलाई सुसंस्कृत र शान्त बनाउन वडाका हरेक व्यक्तिलाई न्यायिक विषयमा जानकारी गराउने हिसाबले कार्यक्रमको गरिएको बताउनुभयो ।थाहा नगरपालिकाका १२ वटै वडामा न्यायिक सचेतना प्रदान गर्ने हेतुले कार्यक्रमको संचालन गरेको हो । 

थाहा २ का वडा अध्यक्ष तथा न्यायीक समिती सदस्य बम बहादुर सिन्तानले वडामा हुने स–साना विवादले पनि समाजमा विचल आएको बताउँदै यसलाई स्थानीय तहमा नै  मिलाउनु पर्छ भन्ने उद्देश्यले न्यायीक समिति गठन भएको र त्यसै अनुरुप काम भएको बताउनुभयो । 

त्यस्तै थाहा नगरपालिकाका कार्यपालिका सदस्य तथा न्यायिक समिती सदस्य समेत रहेकी अनिता बलले समाजमा हुने कस्ता–कस्ता बिषय न्यायीक समितिले हेर्छ । त्यसमा नागरिकले कसरी सहभागीता जनाउन सक्छन् भन्ने उद्देश्यले कार्यक्रम संचालन गरिएको बताउनुभयो । यसमा टोल विकास संस्थाको समेत महत्वपूर्ण भूमिका हुने उहाँको भनाई छ । 
कार्यक्रममा मेलमिलापको अवधारणा, सैद्धान्तिक ज्ञान, फाइदा–बेफाइदा, न्यायिक समितिको काम कर्तव्य र अधिकार, न्यायिक निरुपण सम्बन्धि कार्यक्षेत्र,मेलमिलापकर्ताको भुमिका,गठन प्रक्रिया  लगायत ऐनका विषयमा जानकारी गराइएको  न्यायीक समिती सहजकर्ता गोपी कार्कीले जानकारी दिनुभयो।
यो बर्ष थाहामा अहिले सम्म ४२ वटा उजुरी परेकोमा ३२ वटा उजुरी लाई मेलमिलाप बाट हल गरिएको र ३ वटा उजुरीलाई अदालत समक्ष पठाइएको र ७ वटा उजुरीमाथी सुनुवाइ हुन बाकी रहेको सहजकर्ता कार्कीले जानकारी दिनुभयो।
स्थानीय सरकार सञ्चालन ऐन २०७४ अनुसार स्थानीय तहलाई सामान्य प्रकृतिका मुद्दामा फैसला गर्ने र केही विवादमा मेलमिलाप मात्र गराउन पाउने गरी दुई किसिमको क्षेत्राधिकार दिइएको छ । सामान्य प्रकृतिका पारिवारिक, समाज तथा छरछिमेकमा परिरहने किसिमका विवाद निरुपणको जिम्मा पनि स्थानीय तहको न्यायिक समितिलाई दिइएको छ ।
संविधानको धारा २१७ मा कानुन बमोजिम आफ्नो अधिकार क्षेत्र भित्रका विवाद निरुपण गर्न गाउँपालिका वा नगरपालिकाले प्रत्येक गाउँपालिकामा उपाध्यक्षको संयोजकत्वमा र प्रत्येक नगरपालिकामा उपप्रमुखको संयोजकत्वमा तीन सदस्यीय एक न्यायिक समिति रहने र सो बमोजिमको न्यायिक समितिमा गाउँसभा वा नगरसभाबाट आफूमध्येबाट निर्वाचित गरेका दुईजना सदस्य रहने व्यवस्था समेत छ ।