थाहामा संविधान दिवसको अवसरमा ‘संविधान कार्यान्वयनमा स्थानीय तहको भूमिका’ विषयक अन्तरक्रिया
साथै दिउँसो झण्डोत्तलन र साँझ दीप प्रज्वलन

मकवानपुरको उत्तरी क्षेत्रमा रहेको  थाहा नगरपालिकामा अन्तरक्रिया, झण्डोत्तलन र दीप प्रज्वलन गरेर चौंथो संविधान दिवस मनाइएको छ । संविधान दिवसको अवसरमा शुक्रबार विहान ‘संविधान कार्यान्वयनमा स्थानीय तहको भूमिका’ विषयक अन्तरक्रिया कार्यक्रम आयोजना गर्नुका साथै दिउँसो झण्डोत्तलन र साँझ दीप प्रज्वलन गरिएको थियो । 
थाहा नगरपालिका–४ नयाँगाउँमा थाहा दर्शनका  प्रणेता स्व. रुपचन्द्र विष्टको स्मृतिमा निर्माणाधीन थाहा स्मृति पार्कमा झण्डोत्तलन गरिएको थियो भने थाहा नगरको बजार केन्द्र थानाबजारस्थित बुद्धचोकमा दीप प्रज्वलन गरिएको थियो । 
संविधान दिवस आयोजक मूल समारोह समिति थाहानगरका प्रमुख एवम् थाहा नगरपालिकाका मेयर लवशेर विष्टको अध्यक्षतामा सम्पन्न अन्तरक्रिया कार्यक्रममा मेयर विष्ट, उपमेयर खड्गबहादुर गोपाली, नेपाल कम्युनिष्ट पार्टी(नेकपा) का नगर अध्यक्ष अरुण रायमाझी, नेपाली काँग्रेसका नगर सभापति योगेन्द्रमान श्रेष्ठ, जिल्ला सहकारी संघ मकवानपुरका संचालक विमलकुमार ढकाल, नेकपाका ईश्वर रुम्बा, महिला नेतृ कल्पना बलामी, होटल एसोसिएसन थाहानगरका अध्यक्ष शिबकुमार खत्री, फरक सोचका अभियन्ता यादवजङ रायमाझी, जिल्ला रेडक्रसका उपकोषाध्यक्ष हरिकृष्ण कार्की , जनमुखी सहकर्मी अक्कलबहादुर केसी, पालुङ जेसीजका अध्यक्ष कुमार नेगी लगायतले संविधान कार्यान्वयनका जटिलता र स्थानीय तहको भूमिकाको बारेमा चर्चा गरेका थिए । 
कार्यक्रममा थाहा नगरपालिकाका प्रमुख प्रशासकीय अधिकृत हरिलाल पुरीले संविधान कार्यान्वयनका व्यवहारिक चुनौतिहरुको विषयमा प्रकाश पार्दै अन्तरक्रियाको विषय प्रवेश गराएका थिए । 
अन्तरक्रिया कार्यक्रममा जनप्रतिनिधि, राजीनीतिक दल, संघसंस्थाका प्रतिनिधि, संचारकर्मी लगायतको सहभागिता रहेको थियो ।