थाहानगरका ६४ वटा पसलमा अनुगमन, ६ वर्षअघिको सामानसमेत बेचिँदै

एक सातादेखि थाहानगरका खाद्यान्नसहितका पसलहरुमा अनुगमन तीव्र पारेको थाहा नगरपालिकाले अहिलेसम्म ६४ वटा पसलहरुमा अनुगमन गरेको छ । अनुगमनको क्रममा अधिकाँस पसलहरुमा म्याद गुज्रिएको सामानहरु विक्री भइरहेको पाइएको थियो । ६ वर्षअघिको सामान पनि विक्रीका लागि राखिएको पाइएको अनुगमन समितिका एक सदस्यले बताए । 
नगरउपप्रमुख खड्ग गोपाली संयोजक रहेको समितिले थाहाको शिखरकोट, ओखरबजार, बज्रवाराही, डाँडाबास, चित्लाङ, टिस्टुङलगायतका बजारहरुमा अनुगमन गरेको हो । अनुगमनको क्रममा अधिकाँस पसलहरुमा म्याद गुज्रिएको सामान विक्री भइरहेको पाइएकोले अब पुनः देहोरिए त्यस्ता विक्रेताहरुलाई कारवाहीको दायरामा ल्याइने अनुगमन प्रमुख गोपालीले बताए ।
‘म्याद नाघेका सामान जफत गरेर एक पटकलाई सम्झाइबुझाइ गरेको छौं, अर्कोपटक यस्तै दोहोरिए कारवाहीको चेतावनी पनि दिएका छौं, पुनः अनुगमन गर्दा म्याद नाघेको सामान विक्रीका साथै पसलेहरुले पालना गर्नुपर्ने कुरा नगरेको पाइए हदैसम्मको कारबाही गर्छौं,’ उनले भने । अनुगमन टोली पुग्दा अधिकाँस पसलहरुमा विक्री मूल्यको सूचीसमेत भेटिएको थिएन । 
अनुगमनको क्रममा दाल, चमल लगायतका खाद्यान्नहरुको तौलमा एकरुपता देखिएको थियो । तर विक्रीमूल्य भने फरकफरक पाइएको अनुगमन समितिले जनाएको छ । 
अनुगमन समितिका एक सदस्यका अनुसार ग्रामीण भेगका अधिकाँस पसलहरुले रिटेलर गाडीबाट सिधै सामान लिने गरेको र त्यसरी खरिद गर्दा सामानमा बनेको मिति र एक्सपाइरी मिति हेर्ने नगरेको पाइएको छ । समितिले एउटा रिटेलर गाडीलाई रोकेर सामान चेकजाँचसमेत गरेको थियो । उक्त गाडीमा रहेको सामानसमेत म्याद गुज्रिसकेको पाइएपछि गाडी फिर्ता गरिएको र दोहोरिए कारवाही गर्ने चेतावनी दिइएको छ । 
अनुगमनमा नगरपालिका, प्रहरी, उद्योग वाणिज्य संघ, संचारकर्मी, उपभोक्ता संघ लगायतको प्रतिनिधिहरुको सहभागिता रहेको थियो ।