थाहाको नारदतिर्थ,त्रिवेणी शंखमुलमा शंखधारा जडानकार्य सुरु

मकवानपुरको थाहा नगरपालिकास्थित ऐतिहासिक धार्मिकस्थल शंखमुलमा शंखकै आकृतिका धारा जडान गर्ने कार्य धमाधम भइरहेको छ । थाहा नगरपालिका २ र ३ को संगमस्थलमा रहेको शंखमुलमा ‘मोक्षधाम शंखमुल नेपाल नामक संस्था नै दर्ता गरी सोही संस्था मार्फत शंखको आकारको १०८ वटा धारा जडान गर्ने कार्य सुरु गरिएको हो ।
संस्थाका अध्यक्ष गुप्त कार्कीका अनुसार शंख जडान गर्नका लागि दाताहरुबाट सहयोग जुटाएइको छ । ‘एउटा शंख जडान गर्न दाताहरुबाट ४० हजार रुपैयाँ संकलन गरेका छौं,’ उनले भने । १०८ दाताले शंख राख्नका लागि रकम उपलब्ध गराइसकेको उनले बताए । प्रत्येक शंखका दाताले उपलब्ध गराएको नाम उक्त स्थानमा नै लेख्ने व्यवस्था मिलाइएको अध्यक्ष कार्कीले बताए ।
नगरकै गौरवको आयोजना रहेको मोक्षधाम संस्थाका लागि चालु आर्थिक वर्षका निम्ति ३० लाख रुपैयाँ बजेट विनियोजन गरेको छ । थाहा नगरपालिकाका नगर प्रमुख विष्णु बहादुर विष्टले आवश्यक परे थप रकम पनि उपलब्ध गराइने बताए । उक्त स्थानमा जडान गरिएका वटा १०८ शंखको आकारको धाराबाट चौबिसै घन्टा पानी झार्नका लागि खैटे खोलाबाट पानी ल्याउने व्यवस्था मिलाएको छ । मोक्षधाममा एउटा ठूलो शंख पनि राख्न निर्माण कार्य पनि सुरु गरिएको अध्यक्ष कार्कीले बताए ।
पौराणिक महत्व बोकेको शंखमूलमा १०८ धारा निर्माण गरिसकेपछि यस क्षेत्रमा धार्मिक पर्यटन प्रवद्र्धनमा योगदान पुग्ने अपेक्षा गरिएको छ । गर्मीयाममा पर्यटकहरू सिमभञ्ज्याङ, दामन, मार्खु र चित्लाङ जस्ता क्षेत्रमा पुग्ने गरेका छन् । प्राकृतिक सौन्दर्यसँगै धार्मिक आस्थाका केन्द्र समेत रहेको थाहा नगरपालिका धार्मिक पर्यटनका लागि आकर्षक बन्दै गएको छ ।
पशुपतिनाथस्थित शंखमूल र थाहा नगरपालिकाको त्रिवेणी शंखमूललाई विश्वका तीन प्रमुख शक्तिशाली शंखमूलमध्येमा गणना गरिन्छ । धार्मिक अगुवाहरुका अनुसार यसको पौराणिक महत्व ‘नेपाल महात्म्य हिमवत खण्ड’मा समेत उल्लेख गरिएको छ । विश्वका तीन प्रमुख शंखमूलमध्ये एक पशुपतिनाथमा, अर्को थाहामा र तेस्रो भारतमा रहेको मान्यता छ । नगर प्रमुख विष्ट शंखमूलको संरक्षण र प्रवद्र्धनले देशव्यापी रुपमा परिचित गराउन सहज हुने बताए ।
शंखमुलमा विशाल शंख, मन्दिर, पार्क, होमकुण्ड तथा तीर्थकुण्ड निर्माणाका लागि डिपिआर बनाइएको छ । ऋषेश्वरबाट उत्तरतर्फ बगेको नारायणी नदी र त्रिवेणीघाटबाट पूर्वतर्फ बगेको नदीको संगमस्थललाई नै शंखमुल गंगा मानिने जनविश्वास छ ।