जन्म दिनमा टुहुरालाई पोसाक, वृद्धवृद्धालाई चिनी

मकवानपुरको थाहा नगरपालिकाका एक जना वडा अध्यक्षले आफ्नो जन्म दिनको अवसरमा वडाका टुहुरा बालबालिकालाई विद्यालय पोसाक र वृद्धवृद्धालाई चिनी प्रदान गर्नुभएको छ । 
थाहा नगरपालिका–११ का वडा अध्यक्ष किरणमान बलले मंगलबार आफ्नो जन्म दिनमा टुहुरा बालबालिकालाई पोसाक र वृद्धवृद्धालाई चिनी प्रदान गर्नुभएको हो ।  जन्मदिनमा फजुल खर्च गर्नु भन्दा अनाथ, असहायहरुलाई सहयोग गर्नु उचित लागेकोले सोही बमोजिम टुहुरा र बृद्धबृद्धाहरुलाई सहयोग गरेको वडा अध्यक्ष बलले बताउनुभयो 
बलले आफ्नो वडाका २५ जना टुहुरा बालबालिकालाई वडा कार्यालयमै बोलाएर एक कार्यक्रमको आयोजना गरी पोसाक वितरण गरेका हुन् भने हेटौंडा, रातोमाटेस्थित दिव्य सेवा निकेतन वृद्धाश्रममा रहेका वृद्धवृद्धाको लागि एक महिनाका लागि पुग्ने चिनी वितरण गर्नुभएको हो । बलसहितको १२ जना युवाहरुको समूहले दिव्य सेवाको लागि प्रत्येक वर्ष वर्षभरिको लागि पुग्ने चिनी सहयोग गर्दै आएको छ । 
थाहा नगरपालिका सामाजिक समितिका संयोजकसमेत रहेका बलले आफ्नो जन्म दिनमा टुहुरा बालबालिकालाई कपडा वितरण गर्नु अघि वडामा रहेका टुहुरा बालबालिकाहरुको तथ्याङ्क लिनुभएको थियो । वडामा रहेका विभिन्न विद्यालयमा अध्ययनरत बालबालिकाहरुको पारिवारिक अवस्थाबारे विद्यालयमार्फत् नै तथ्याङ्क लिएको उहाँले बताउनुभयो ।
‘तथ्याङ्क अनुसार टुहुरा बालबालिकालाई पहिले नै सूचना गरी बोलाएर कपडा प्रदान गरें, यसो गर्दा बेग्लै आनन्दको महशुस भएको छ,’ उहाँले भन्नुभयो । विद्यालय अनुसारको पोसाक पाएपछि बालबालिकाहरु पनि निकै खुशी देखिन्थे । 
बलको जन्म दिन कार्यक्रमको अवसरमा वागेश्वरी माविका प्रधानाध्यापक वीरमान स्याङ्तान, प्रेमसागर फाउण्डेशन जन भोजनालयका व्यवस्थापक भोला राउत लगायतले शुभकामना दिनुभएको थियो । 
थाहा नगरपालिकाको वडा नं. ११ मा टुहुरा बालबालिकालाई वडा कार्यालयले पनि मासिक सहयोग गर्दै आएको छ । बाबु–आमा दुबै नभएका बालबालिकालाई मासिक एक हजार रुपियाँ  र बाबु वा आमा नभएका बालबालिकालाई मासिक पाँच सय रुपिया सहयोग गर्ने गरिएको वडा अध्यक्ष बलले बताउनुभयो ।