चित्लाङको नाट्यश्वरी मन्दिर पुनर्निर्माणका लागि ६ दिनमै जुट्यो करिब ७ लाख
थप सहयोग नपठाउन समितिको आग्रह'

थाहा नगरपालिका–९ स्थित ऐतिहासिक चित्लाङमा रहेको नाट्यश्वरी मन्दिर पुनर्निर्माणका लागि सञ्चालन गरिएको सहयोग अभियानमा ६ दिनको अवधिमै करिब ७ लाख रुपैयाँ संकलन भएको जानकारी सार्वजनिक गरिएको छ।
समितिले सार्वजनिक गरेको सूचना अनुसार मन्दिर पुनर्निर्माण तथा बाँकी निर्माण कार्य सम्पन्न गर्न आवश्यक रकम पर्याप्त रूपमा संकलन भइसकेको बताइएको छ। यससँगै देश तथा विदेशमा रहेका सम्पूर्ण दातागण, शुभेच्छुक तथा सहयोगी महानुभावहरूलाई थप आर्थिक सहयोग नपठाइदिन हार्दिक अनुरोध गरिएको छ।
समितिले दिएको जानकारी अनुसार सहयोग आह्वान गरेपछि छोटो समयमै देश तथा विदेशबाट उल्लेखनीय साथ, सद्भाव र आर्थिक सहयोग प्राप्त भएको छ। सहयोग अभियानप्रति देखाइएको विश्वास, धार्मिक आस्था र सामुदायिक ऐक्यबद्धताप्रति सम्पूर्ण दातागणप्रति कृतज्ञता व्यक्त गरिएको सूचनामा उल्लेख छ।
काठमाडौं उपत्यकालाई तराईसँग जोड्ने प्राचीन व्यापारिक मार्गका रूपमा परिचित चित्लाङ ऐतिहासिक, सांस्कृतिक तथा धार्मिक सम्पदाले सम्पन्न क्षेत्रका रूपमा चिनिन्छ। यहाँ रहेका विभिन्न मठमन्दिर, पुरातात्त्विक सम्पदा तथा परम्परागत बस्तीले चित्लाङलाई धार्मिक तथा सांस्कृतिक पर्यटनको महत्वपूर्ण गन्तव्यका रूपमा स्थापित गर्दै आएका छन्। स्थानीय समुदायका अनुसार नाट्यश्वरी मन्दिर पनि यस क्षेत्रको धार्मिक आस्था र सांस्कृतिक पहिचानसँग जोडिएको महत्वपूर्ण सम्पदामध्ये एक हो।
समितिले सहयोग अभियानमार्फत प्राप्त प्रत्येक रुपैयाँको पूर्ण पारदर्शिताका साथ आय–व्यय विवरण सार्वजनिक गरिने जनाएको छ। साथै, सहयोग गर्ने सबै दाताको नामावली, प्राप्त सहयोग रकम तथा मन्दिर पुनर्निर्माणमा भएको सम्पूर्ण खर्चको विस्तृत विवरण निर्माण कार्य सम्पन्न भएपछि सार्वजनिक गरिने बताइएको छ।
त्यसैगरी, मन्दिर निर्माण सम्पन्न भएपछि सहयोगी दाताहरूको सम्मानस्वरूप उनीहरूको नाम धातुबाट तयार गरिने स्मृति शिलापट्टमा समावेश गरिने उल्लेख गरिएको छ। यसका लागि आवश्यक विवरण यकिन गर्न सम्बन्धित दाताहरूसँग सम्पर्क गरिने पनि समितिले जनाएको छ