काँधमा मोटरकार बोकेर काठमाडाैं ल्याइने गोरेटोलाई पदमार्गमा रूपान्तरण गर्दै चन्द्रागिरि नगर

२०१३ सालसम्म काँधमा मोटरकार बोकाएर राजधानी भित्र्याइने नाका चन्द्रागिरि भञ्जाङसम्म चन्द्रागिरि नगरपालिकाले पदमार्ग बनाइरहेको छ । शासकहरूले त्रिभुवन राजपथ निर्माण हुनुअघि भीमफेदी-चित्लाङ-चन्द्रागिरि भन्ज्याङ हुँदै थानकोट गोदामसम्म श्रमिकहरूको काँधमा कार बोकेर ल्याउने गर्दथे । 

थानकोट-चन्द्रागिरि भन्ज्याङ पदमार्ग नामाकरण गरी निर्माण कार्य अन्तिम चरणमा रहेको करिब ३ किलोमिटर लामो सो मार्ग चन्द्रागिरि नगरपालिका-४ थानकोट पानीघाटबाट सुरू हुँदै चन्द्रागिरि भन्ज्याङसम्म पुग्नेछ।

सो पदमार्गमा सिँढी, विश्रामस्थल, साना पुल, छेकबार लगायतका संरचना निर्माण भइरहेको छ । पदमार्गमा सूचना पाटी लगायत अन्य आवश्यक पूर्वाधारको निर्माणको कार्य बाँकी रहेको नगर प्रमुख घनश्याम गिरीले बताउनुभयो । 

चन्द्रागिरि नगरपालिकामा आन्तरिक तथा बाह्य पर्यटन प्रवर्धनमा सो पदमार्ग कोसेढुङ्गा साबित हुने कुरा बताउनु हुँदै नगर प्रमुख गिरीले निकट भविष्यमा अन्य केहि स्थानमा पनि पदमार्ग र साइकल ट्रेलको निर्माण हुने जानकारी दिनुभयो । 

खुल्ला टेण्डरमार्फत निर्माण कार्य जारी रहेको छ सो पदमार्ग निर्माणका लागि करिब २ करोड रूपैयाँ बजेट विनियोजन भएको छ ।

नगरपालिकाले प्रत्येक वर्ष योजना माग गरेर प्राप्त गर्ने नगरपालिका- प्रदेश समपुरक बजेटबाट उक्त निर्माण कार्य भएको हो जसअन्तर्गत नगरपालिका र बागमती प्रदेश सरकारको ५०/५० प्रतिशत लागत सहभागिता रहेको छ।

नगरक्षेत्रको पर्यटन प्रवर्द्धनका लागि चन्द्रागिरि नगरपालिकाले सामुदायिक होम-स्टे, पदमार्ग निर्माणको कार्यलाई तिव्रता दिइरहेको छ थानकोट टाइम्स बाट साभार।