एकै रात थाहा २ मा दुई घरमा आगलागीबाट ७ लाखको क्षति

मकवानपुर, थाहा नगरपालिका–२ — थाहा नगरपालिका–२ मा फरक–फरक समयमा भएका दुई आगलागी घटनामा एक घर पूर्ण रूपमा जलेर नष्ट भएको छ भने अर्को घटनामा करिब पाँच लाख रुपैयाँ बराबरको क्षति भएको छ।
पहिलो घटना : दियोबाट सल्किएको आगो
यसैगरी, मिति २०८२ फागुन १७ गते साँझ करिब ९:०० बजे, थाहा नगरपालिका–२ अंगारे निवासी गुप्त कार्कीको नयाँ घरसँगै रहेको जस्तापाता छाइएको पुरानो कच्ची घरमा पूजा गर्ने क्रममा बालिएको दियोबाट आगो सल्किएको थियो।
खबर प्राप्त हुनासाथ इलाका प्रहरी कार्यालय पालुङबाट प्रहरी निरीक्षक रुक्शा बज्राचार्यको कमाण्डमा १५ जना र सशस्त्र प्रहरी निरीक्षक युवराज कार्कीको कमाण्डमा १० जना नगर प्रहरी,दमकल  तथा स्थानीयको सहयोगमा आगो नियन्त्रणमा लिइएको थियो।
आगलागीबाट गुप्त कार्कीकी श्रीमती ६१ वर्षीया सान्नानी कार्की धुवाँका कारण निस्सासिएर बिरामी भएकी छन्। उनको उपचार प्राथमिक स्वास्थ्य केन्द्र पालुङमा भइरहेको र अवस्था सामान्य रहेको जनाइएको छ।
उक्त घटनामा घर आंशिक रूपमा जलेको छ भने काठ, अन्नपात तथा कागजातसमेत गरी करिब ५ लाख रुपैयाँ बराबरको क्षति भएको अनुमान गरिएको छ। चौपायातर्फ कुनै क्षति नभएको प्रहरीले जनाएको छ।

दोस्रो घटना : बिजुली सर्ट भई आगलागी
मिति २०८२ फागुन १७ गते राति करिब १०:३० बजे, थाहा नगरपालिका–२ टाखेल निवासी चन्द्रबहादुर देउलाको नयाँ घरबाट करिब ५०० मिटर उत्तरतर्फ रहेको ढुंगा–माटोले बनेको, जस्तापाता छाइएको मानिस नबस्ने पुरानो कच्ची घरमा बिजुलीको तार सर्ट भई आगलागी भएको हो।
घटनाको खबर प्राप्त हुनासाथ इलाका प्रहरी कार्यालय पालुङ बाट प्रहरी निरीक्षक रुक्शा बज्राचार्यको कमाण्डमा १५ जनाको प्रहरी टोली र सशस्त्र प्रहरी निरीक्षक युवराज कार्कीको कमाण्डमा १० जनाको नगर प्रहरी टोली, स्थानीय बासिन्दा तथा दमकलको सहयोगमा आगो पूर्ण रूपमा नियन्त्रणमा लिइएको थियो।
उक्त आगलागीबाट मानवीय तथा चौपाया क्षति नभए पनि घर पूर्ण रूपमा जलेर नष्ट भएको छ। प्रारम्भिक अनुमान अनुसार करिब २ लाख रुपैयाँ बराबरको क्षति भएको ईलाका प्रहरी कार्यालय पालुङले जनाएको छ।