ऋषेश्वर वनको नयाँगाउँ माथि भेटियो गणेश ढुङ्गा(फाेटाे फिचरसहित)

थाहा नगरपालिकाको वडा नंं. ३ र ४ मा फैलिएको ऋषेश्वर सामुदायिक वन क्षेत्रको नयाँगाउँ माथि जङ्गलमा गणेश ढुङ्गा भेटिएको छ । नयाँगाउँमाथि कोलकाटे भनिने जङ्गलनजिकै रहेको यो ढुङ्गा पुस्तौंदेखि देखिँदै आएको र स्थानीयले गणेश ढुङ्गा भन्ने गरेको स्थानीयहरु बताउँछन् । पहिलेदेखि नै गणेश ढुङ्गा भन्ने गरिए पनि यसको कतै चर्चा हुने गरेको थिएन । 

हात्तीको टाउकोसहितको सुँडको प्रष्ट आकारमा रहेको यो ढुङ्गालाई स्थानीयले गणेशको रुपमा लिँदै  आएका छन् । थाहा नगरपालिका वडा नं. ४ मा पर्ने गणेश ढुङ्गा पुग्न नयाँगाउँको सुनगाभा होटलमाथिबाट पैदल १० मिनेट जति लाग्छ ।

घाँसदाउरा गर्न जाँदा स्थानीयहरुले यही गणेश ढुङ्गाको आडमा भारी बिसाउने गरेको स्थानीयहरु बताउँछन् । पहिलेपहिले कतिपयले भने भगवान गणेश सम्झेर मंगलबारको दिन पूजासमेत गर्ने गरेका थिए । 

त्रिभुवन राजपथको नयाँगाउँबाट जङ्गल जाने गोरेटो बाटोलाई सुधार गर्ने हो भने गणेश ढुङ्गा सजिलै पुग्न सकिन्छ । त्यसो त गणेश ढुङ्गा हुँदै पत्कर, घाँस र दाउराको भारी बोकेर हिँड्ने बाटो अहिले पनि छ । 

अहिलेसम्म कुनै माध्यमबाट प्रचारमा आउन नसकेको गणेश ढुङ्गाबारे स्थानीयहरुले गाउँमा कुरा गर्न थालेपछि स्थानीय युवा सानोकान्छा घलेको  सहयोगमा थाहापाटीका सम्पादक कुमार नेगी र दामन एफ. एम. का स्टेशन व्यवस्थापक इच्छापूर्ण कार्कीसहितको टोली त्यसतर्फ गएको थियो । 

थाहा नगरपालिकामा हात्तीको प्रसङ्ग जोडिएका थुप्रै किम्बदन्तीहरु छन् । थाहा नगरपालिका ऋषेश्वर सामुदायिक वनभित्रै पर्ने हात्ती गौंडा, हात्ती ढुङ्गा, हात्ती छि¥यो पुच्छर अड्क्यो र थाहा–३ डाँडागाउँ नजिक हात्तीपाइले जस्ता स्थानहरु हात्तीको कथासँग जोडिएका छन् । 

देव–दैत्य युद्धमा देवगणको पराजय भएपछि वेपत्ता भएका इन्द्रलाई खोज्दै इन्द्रायणी ऐरावत हात्तीमा  चढेर आएको र उक्त हात्तीको पाइला परेको स्थानलाई थाहा–३ मा हात्तीपाइले भनेर चिनिन्छ । 

गणेश ढुङ्गादेखि केही माथि एउटा यस्तो छेडा छ, जसलाई स्थानीयहरु हात्ती छि¥यो, पुच्छर अड्क्यो भन्दछन् । सानो छेडा र त्यसमाथि उकालो भएकोले भारी बोकेर झर्दा भारी अड्किने गरेकोले यसलाई हात्ती छि¥यो, पुच्छर अड्क्यो भन्ने उखानसँग जोडेको पनि हुन सक्ने स्थानीय जानकारहरु बताउँछन् ।