इन्द्रायणी जात्राको लागि आज विधिवत निमन्त्रणा पुजा

मकवानपुरको थाहानगरमा प्रत्येक तीन/तीन वर्षमा लाग्ने इन्द्रायणी जात्राको तयारी तिब्र पारिएको छ । साँस्कृतिक रुपले नेवार र देउला समुदायसँग प्रत्येक्ष जोडिएको इन्द्रायणी जात्राको लागि पूजाविधि अनुसारको तयारीलाई तिब्रता दिइएको इन्द्रायणी भगवती कालाभैरब गुठी संरक्षण समितिका अध्यक्ष श्याम भक्त श्रेष्ठले जानकारी दिए ।
जात्राको तयारी स्वरुप १५ मंसिरमा पालुङ देउला गाउँ (इन्द्रायणी बस्ती) बाट खाली रथ पालुङ शहरमा ल्याइएको छ । देउता घरबाट पालुङ ल्याइने रथ खाली ल्याउने चलन छ । तीन वर्षे जात्राको नियम तान्त्रिक विधि विधान अनुसार मनाइन्छ । जात्रा हुने चार दिन अगाडि १५ मंसिर अर्थात मंसिर शुक्ल द्वादशीको दिन पारेर खाली रथ पालुङ ल्याइएको हो । यसरी रथ ल्याउँदा पालुङबाट नेवार समुदायकै व्यक्तिहरु गई ल्याउने चलन छ ।
रथ पालुङमा ल्याएपछि गुठायारको भोज र निमन्त्रणा पूजा सुरु हुन्छ । द्वादशीको दिनदेखि पहिलो निम्तो पूजा भगवती पूजारीबाट हुन्छ । त्रयोदशीको दिन काला भैरव पूजारीबाट पूजा र भोज हुन्छ । चतुर्दशीका दिन इन्द्रायणी पूजारीबाट हुन्छ र गुठायार खुवाउने कार्य समाप्त हुन्छ । जात्राको अवसरमा इन्द्रायणी, कुमारी, कालाभैरब र गणेशको रथारोहण गरिन्छ ।
जात्रा आरम्भ निमन्त्रणा पूजा भाद्र शुक्ल पूर्णिमाका दिन इन्द्रजात्राको शुभ दिन परोर गरिएको थियो । निमन्त्रणा पूजाको करिब चार महिनापछि यो जात्रा मनाइने चलन छ । यसवर्षको जात्रा यहि मंरि १८, १९ र २० गते परेको छ ।
मकवानपुरको पालुङमा मध्यकालदेखि नै प्रचलनमा रहेको ३ वर्षे इन्द्रायणी जात्रा  मंसिर शुक्ल पूर्णिमा अर्थात् यही मंसिर १८ गते बाट थाहा नगरपालिकाको इन्द्रायणी चौरमा ३ दिनसम्मका लागि इन्द्रायणी जात्रा हुने भएको हो ।
इन्द्रायणी भगवति कालाभैरव गुठी संरक्षण समितिको व्यवस्थापनमा हुँदै आएको इन्द्रायणी जात्राको अवसरमा पहिलो दिन इन्द्रायणी माइको थानमा रथ लैजाने, दोस्रो दिन मुख्य पूजा र तेस्रो दिन रथ फर्काउने चलन रहेको छ । मेला अवधिमा थाहा नगरपालिका–२ का देउला समुदाय र नेवार समुदायले दिनरात नै पुजा गर्ने गर्दछन् ।
इन्द्रायणी माइ थानमा  राती पञ्चबली सहित तान्त्रिक विधिबाट पुजा हुने गर्दछ ।  जात्रामा पाटनबाट आएका तान्त्रिक कर्माचार्यहरुले विशेष पूजाआजा गर्ने गर्दछन् ।
जात्रामा स्थानीय क्षेत्रका हजारौं भक्तजनहरु आउने गरेका छन् भने स्थानीय नेवार तथा देउला समुदायमा टाढाबाट आउने पाहुनाहरुले घरहरु खचाखच हुने गर्दछ । इन्द्रायणी माइको पूजा र भाकल गरेमा मनोआकाँक्षा पूरा हुने विश्वास रही आएको