अवैध घरेलु भरुवा बन्दुकसहित थाहा ४ का दुई जना पक्राउ

मकवानपुरको थाहा नगरपालिका–४, धारापानी (हरिकेसी टोल) मा अवैध घरेलु हतियार लुकाई राखेको सूचनाका आधारमा प्रहरीले दुई जनालाई पक्राउ गरेको छ।
फागुन १६ गते दिउँसो करिब १:४० बजे प्राप्त गोप्य सूचनाअनुसार प्रहरी टोली खटिई आवश्यक सूचना संकलन तथा खोजतलास गरिएको थियो। सो क्रममा स्थानीय बिक्रम रायमाझीले अवैध घरेलु भरुवा बन्दुक आफ्नो ठूलोबुवा नाताका कुमार रायमाझीको घरकोठाभित्र लुकाई राखेको प्रारम्भिक सोधपुछका क्रममा बताएका थिए।
त्यसपछि बिक्रम रायमाझीलाई साथमा लिई प्रहरी टोली थाहा नगरपालिका–४, धारापानीस्थित कुमार रायमाझीको घरमा पुगेको थियो। आवश्यक सोधपुछपश्चात कानुन बमोजिम खानतलासी सूचना पुर्जी दिई स्थानीय व्यक्तिहरु तथा जनप्रतिनिधिको रोहबरमा घरकोठा तलासी गर्दा कोठाभित्र १ नाले अवैध घरेलु भरुवा बन्दुक जस्तो देखिने हतियार फेला परेको प्रहरीले जनाएको छ।
साथै साना–साना पोका पारी राखिएको बारुद जस्तो देखिने पदार्थ, ‘Asthalin’ लेखिएको प्लास्टिकको डिब्बाभित्र स-साना फलामका छर्रा, सलाईको बट्टाबाट बाहिरी बारुद निकालिएका सलाईका काटीसमेत बरामद गरिएको छ।
बरामद हतियार तथा सामग्री रितपूर्वक नियन्त्रणमा लिई  उनीहरुविरुद्ध हातहतियार तथा खरखजाना सम्बन्धी कसूरमा मुद्दामा मकवानपुर जिल्ला अदालत, हेटौंडाबाट म्याद थप अनुमति लिई थप अनुसन्धान भइरहेको प्रहरीले जनाएको छ।