मकवानपुरमा करेन्ट लागेर २ जनाको मृत्यु, ३ जना घाइते

मकवानपुरको इन्द्रसरोवर गाउँपालिका–३ सिस्नेरीको कुइन्टार भन्ने ठाउँमा गुडिरहेको ट्रकमा ११ हजार भोल्टेजको करेन्ट लाग्दा ट्रक चालकको घटनास्थलमै मृत्यु भएको छ । करेन्ट लागेर छट्पटाइरहेका ट्रक चालकलाई बचाउन जाँदा अर्को एक जनाले पनि ज्यान गुमाएका छन् ।
करेन्ट लागेर मृत्यु हुनेमा ना ७ ख ९३२६ नम्बरको लहरी ट्रकका चालक बेलकोटगढी गाउँपालिका–७ नुवाकोटका ३५ वर्षीय विशाल तामाङ र तीनपटन गाउँपालिका–९ सिन्धुलीका २८ वर्षीय वीर बहादुर मगर रहेको  मकवानपुरका प्रहरी नायब उपरीक्षक यज्ञप्रसाद भट्टराईले जानकारी दिए ।
बाग्मतीको पानी प्रयोग गरी बिधुत उत्पादनको तयारीमा रहेको सिस्नेरीमा रहेको माण्डु हाइड्रोपावरका लागि विद्युतीय सामग्री बोकेर आयोजनास्थलतर्फ जाँदै गर्दा लहरी ट्रकमा करेन्ट सर्ट भएको थियो ।
लहरी ट्रक र एक्साभेटर अघिपछि रहेर गुडिरहेकोमा ट्रकले ११ हजार भोल्टेजको हाइटेन्सन लाइनमा छुँदा करेन्ट सर्ट भएको देखेपछि एक्साभेटर अपरेटर वीरबहादुर मगर सहयोगका लागि जाँदा उनलाइ पनि करेन्ट लागेको थियो । उबडखाबडका कारण सडकमा लहरी ट्रकलाई अघि बढ्न समस्या भएपछि एक्साभेटर पनि सँगै गएको थियो । 
उक्त घटनामा ट्रकका सहचालक तीन पाटन ९ बस्ने २५ वर्षीय गोपाल रामुनी र दाङ घर भई ललितपुर बस्ने निर्माण कम्पनीका ४५ वर्षीय महेश बस्नेत घाइते भएका छन् । उनीहरूलाई उपचारको लागि काठमाडौँ लगिएको मकवानपुर प्रहरीले जनाएको छ ।
११ हजार भोल्टेजको हाइटेन्सन लाइन व्यवस्थापन नहुँदा ट्रकले विद्युत सुचारु तारमा छुन पुगेको थियो । केही दिन अघि ट्रिपरले विद्युत पोलमा ठक्कर दिए पछि जोखिम बढेको थियो । त्यतिबेला नेपाल विद्युत प्राधिकरणले ट्रिपरलाई जरिवाना तिराएको भए पनि पोल पक्की नगरेको स्थानीले बताएका छन् ।