स्वच्छन्द भैरव डोजोको दमदार प्रदर्शन, राष्ट्रिय करातेमा तेस्रो स्थान

नेपाल सितोरियो कराते संघ अन्तर्गत इलाइट कराते ट्रेनिङ सेन्टरद्वारा आयोजित इलाइट कराते खुल्ला राष्ट्रिय प्रतियोगिता २०८२ मा थाहा नगरपालिकाको स्वच्छन्द भैरव डोजो उत्कृष्ट प्रदर्शन गर्दै तेस्रो स्थान हासिल गर्न सफल भएको छ।
दशरथ रंगशालामा माघ ११ र १२ गते सम्पन्न प्रतियोगितामा देशभरबाट करिब १८ सय खेलाडी सहभागी थिए। सो प्रतियोगितामा स्वच्छन्द भैरव डोजोले ३ स्वर्ण, १ रजत र ४ कास्य पदक जित्दै समग्रमा तेस्रो स्थान सुरक्षित गरेको प्रशिक्षक रोशन बलामीले जानकारी दिए।
पदक विजेताहरूमध्ये भुमिका बलामीले काता विधातर्फ स्वर्ण पदक जितिन् भने ४० केजि तौल समूहमा रजत पदक हात पारिन्। त्यसैगरी ५० केजि तौल समूहमा करन गमालले स्वर्ण, ६० केजि तौल समूहमा निशान बलामीले पनि स्वर्ण पदक जित्न सफल भए।
पुरुषतर्फ अर्जुन गमालले १३ वर्ष उमेर समूहमा कास्य पदक जित्दा महिलातर्फ सुजता विश्वकर्माले कास्य पदक हात पारिन्। यस्तै, ६० केजि महिला तौल समूहमा संगिता मोक्तान र ५५ केजी तर्फ प्रेरणा गोलेले पनि कास्य पदक जितिन्।
स्वच्छन्द भैरव डोजोको यस सफलताले थाहा नगरपालिकाको खेलकुद क्षेत्रमा उत्साह थपिएको बताउदै  आगामी प्रतियोगिताका लागि खेलाडीहरूलाई थप प्रेरणा मिलेको थाहा नगर खेलकुद विकास समिती संयोजक टिकाराम स्याङ्तानले बताए।