राष्ट्रपति रनिङ शिल्ड प्रतियोगितामा थाहा ८ स्वर्ण सहित दोस्रो स्थानमा,कराँतेमा सहभागी सबैले जिते पदक

मकवानपुर जिल्ला खेलकुद विकास समितिको आयोजनामा आज आइतबारबाट जिल्लास्तरीय राष्ट्रपति रनिङ शिल्ड प्रतियोगिता सुरु भएको छ। हेटौंडा–४, हुप्रचौरमा १५ औं संस्करणको मकवानपुर जिल्लास्तरीय राष्ट्रपति रनिङ शिल्ड प्रतियोगिता सुरु भएको हो । 
आज भएको प्रतियोगितामा थाहा नगरपालिका बाट सहभागी १० जना कराते खेलाडिले सबैले पदक जित्न सफल भएका छन।कराते प्रशिक्षक रोशन बलामीले दिएको जानकारी अनुसार आज थाहाले करातेमा ४ स्वर्ण,३ रजत र ४ कास्य सहित ११ वटा पदक प्राप्त गरेको हो।

आज भएको खेलमा थाहा नगरपालिका ८ स्वर्ण सहित दोस्रो स्थानमा रहेको थाहा नगर शिक्षा शाखाका देवेन्द्र कार्कीले जानकारी दिनुभयो।

प्रतियोगिता मंगलबारसम्म सञ्चालन हुने मकवानपुर जिल्ला खेलकुद विकास समितिका अध्यक्ष राजकुमार मोक्तानले जानकारी दिनुभएको छ। 
प्रतियोगितामा मकवानपुरको विभिन्न पालिकामा भएको पालिकास्तरीय राष्ट्रपति रनिङ शिल्ड प्रतियोगिताबाट छनोट भएका खेलाडीहरु सहभागी भएको प्रतियोगिता अन्तर्गत एथ्लेटिक्स, कबड्डी, भलिबल, कराँते, उसु, तेक्वान्दोका खेलहरु सञ्चालन हुने उहाँले बताउनुभयो ।

कराँते, उसु, तेक्वान्दो हेटौंडा–४, पारिजातपथस्थित बहुउद्देश्यीय कभर्ड हलमा हुने उहाँले बताउनुभयो । एथ्लेटिक्स हुप्रचौरमा र भलिबल हुप्रचौरको भलिबल कोर्टमा सञ्चालन हुनेछ । प्रतियोगितामा प्रथम, द्वितीय र तृतीय हुने खेलाडीहरुलाई क्रमशः स्वर्ण, रजत र काँस्य पदकसहित प्रमाणपत्र प्रदान गरिनेछ ।

जिल्लास्तरीय प्रतियोगिताबाट छनोट भएका खेलाडीहरुलाई जिल्ला खेलकुद विकास समितिले बन्द प्रशिक्षणमा राखेर प्रदेशस्तरीय प्रतियोगितामा सहभागी गराउने उहाँले बताउनुभयो । जिल्लास्तरीय रनिङ शिल्ड प्रतियोगिताबाट भलिबल र कबड्डीतर्फ उत्कृष्ट प्रदर्शनी गर्ने छात्र तथा छात्रा छनोट गरेर प्रदेशस्तरीय प्रतियोगितामा सहभागी गराइने उहाँले बताउनुभएको छ । तेक्वान्दो, उसु, कराँते, एथ्लेटिक्सका खेलहरुमा प्रथम हुने खेलाडीलाई प्रदेशस्तरीय प्रतियोगितामा सहभागी गराइने उहाँले बताउनुभयो ।

१४ औं संस्करणको राष्ट्रपति रनिङ शिल्ड प्रतियोगिताको उपाधि हेटौंडा उपमहानगरपालिकाले जितेको थियो । हेटौंडाले २० वटा स्वर्ण, ७ वटा रजत र १९ वटा काँस्य पदक प्राप्त गर्दै उपाधि जितेको थियो । बकैया गाउँपालिकाले १२ वटा स्वर्ण, १० रजत र ८ वटा काँस्य पदक प्राप्त गर्दै द्वितीय र थाहा नगरपालिकाले ७ वटा स्वर्ण, ८ वटा रजत र १३ वटा काँस्य पदक प्राप्त गरेर तृतीय भएको थियो ।

प्रतियोगितामा मकवानपुरको ९ वटा पालिकाबाट विभिन्न विधाका करिब ६ सय जना खेलाडीहरुको सहभागिता रहेको छ । राष्ट्रपति रनिङ्ग शिल्ड प्रतियोगिता अन्तर्गत भलिबल, एथ्लेटिक्स, उसु, कराँते, तेक्वान्दो कबड्डी लगायतका खेलहरु सञ्चालन हुनेछ । इन्द्रसरोवर गाउँपालिका प्रतियोगितामा सहभागी भएको छैन । प्रतियोगिताको उद्घाटन तेक्वान्दोको काता प्रदर्शनी, मार्चपास र टिससहित गरिएको थियो ।