फुर्केमा नगर स्तरीय भलिवल सुरु,१९ टिमको सहभागिता

थाहा नगरपालिका वडा न ५ फुर्केमा बिजया दशमीको अवसर पारेर थाहा नगरपालिका स्तरीय भलिबल प्रतियोगिता सुरु भएको छ।
थाहा नगरपालिकाको आयोजना तथा थाहा ५ खेलकुद बिकास समिती फुर्के बसन्तको व्यवस्थापनमा सौगात स्मृति भलिबल प्रतियोगीताको कार्तिक १ गते थाहा नगरपालिकाका उपप्रमुख भरत गोपालीले उद्घाटन गरेका हुन। 
प्रतियोगिता उद्घाटन गर्दै उपप्रमुख भरत गोपालीले प्रतियोगिताले खेलाडी उत्पादन गर्न जोड दिदै अनुशासित भएर प्रतियोगिता खेल्न आग्रह गर्दै खेल क्षेत्रमा बजेट अपुग भएको आफुले महसुस गरेको बताउदै आगामी दिनमा समग्र खेलकुदको बिकासमा नगरपालिकाको ध्यानाकर्षण हुने बताए।
खेलकुद विकास समिती थाहा ५ का अध्यक्ष पुरुषोत्तम गुरुङको सभापतित्वमा सम्पन्न कार्यक्रममा नगर खेलकुद विकास समिती संयोजक राजकुमार बलामी,थाहा नगरपालिकाका प्रमुख प्रशासकीय अधिकृत कृष्ण गिरी,वडा न ५ का अध्यक्ष बिष्णु बहादुर गुरुङ,सामाजिक विकास शाखा प्रमुख अनिल लामिछाने ,स्थानीय समाजसेवी ज्योती रायमाझी ,लगायतका उपस्तिथि रहेको थियो।
कार्तिक १ गते बाट फुर्के खेलमैदानमा सुरु भएको  प्रतियोगितामा कुल १९ टिमले टिम दर्ता गरेको  आयोजकले जनाएको छ।
थाहा ५ खेलकुद बिकास समितिको अनुसार प्रथम हुने टिमले नगद ५१ हजार सहित ट्रफी,मेडल तथा प्रमाणपत्र प्राप्त गर्ने छन भने दोस्रो हुने टिमले ३० हजार नगद सहित मेडल तथा प्रमाणपत्र प्राप्त गर्ने छन भने तेस्रो हुनेले नगद १५ हजार सहित मेडल तथा प्रमाणपत्र प्राप्त गर्ने छन।
प्रतियोगिता राष्ट्रिय रेफ्री हरिनारायण श्रेष्ठ र प्रादेशिक रेफ्री प्रमोद तिमिल्सिनाले खेलाइरहेका छन।
प्रतियोगितामा भाग लिनको लागि सम्बन्धित वडाकै खेलाडी हुनुपर्ने तथा खेलाडीको फोटो र परिचयपत्र पनि अनिवार्य गरिएको आयोजकले जानकारी दिएको छ।