दोलखाको जिरीमा १५ कात्तिकदेखि जारी बागमती प्रदेश स्तरीय अन्तरपालिका भलिवल च्याम्पियनशिप प्रतियोगितामा थाहा नगरपालिका उपविजेतामा सीमित हुन पुगेको छ । जिरीमा भर्खरै सम्पन्न प्रतियोगिताको फाइनलमा थाहानगर भरतपुर महानगरपालिकासँग पराजित भएको छ । यससँगै थाहा नगरपालिका च्याम्पियनशीपको दोस्रो स्थानमा रहन पुगेको हो ।

प्रतियोगिताको फाइनलमा उत्कृष्ट प्रदर्शनका बावजुद थाहा नगरपालिका उपविजेतामै सीमित हुनुपरेको सामाजिक विकास शाखा प्रमुख अनिल लामिछानेले बताए । थाहानगरपालिकाको खेलको उच्च प्रशंसा गर्दै जिरीमै रहेका थाहा नगरपालिकाका प्रमुख विष्णुबहादुर विष्टले थाहानगरपालिका खेलकुदमा पनि अब्बल रहेको बताए । सो क्रममा नगर उपप्रमुख भरत गोपालीले थाहा नगरपालिका भलिवलमा बागमती प्रदेशकै दोस्रो स्थानमा रहनुको ऐतिहासिक महत्व र प्रतिष्ठा रहेको बताए ।

प्रतियोगितामा सहभागी हुन १४ कात्तिकमा १५ जनाको टोली जिरी पुगेको थियो । खेलाडीहरुलाई हौसला प्रदान गर्न नगर प्रमुख विष्ट, उपप्रमुख गोपाली, खेलकुद विकास समिति सदस्य राजकुमार बलामी, सामाजिक विकास शाखा प्रमुख अनिल लामिछाने लगायत जिरी पुगेका थिए । उपविजेताको रु. १,०१,००० नगद पुरस्कार, पदक र प्रमाणपत्र लिएर थाहानगर टोली आजै फर्किने कार्यक्रम रहेको छ ।

विजेताहरुलाई आजै पुरस्कार वितरण गरिएको छ । जिरी च्याम्पियनसिप स्पोर्टस फेस्टिबल अन्तर्गत खुला भलिबल प्रतियोगिताको विजेता भरतपुर महानगरपालिकाका खेलाडीहरुले १ लाख ५१ हजार सहित
शिल्ड, मेडल र प्रमाणपत्र प्राप्त गरेका छन् । यस्तै, द्धितीय हुने थाहा नगरपालिकाले १ लाख १ हजार, तृतीय गोकुलगंगा गाउँपालिकाले ५१ हजार र सान्त्वना लिखु तामाकोशीले २५ हजार पुरस्कार सहित शिल्ड, मेडल र प्रमाणपत्र पाएका छन् । उनीहरुलाई प्रतिनिधिसभा सदस्य गंगा कार्कीले पुरस्कार हस्तान्तरण गर्नुभएको हो ।
प्रदेशसभा सदस्य कुण्दनराज काफ्लेबाट उद्घाटन गरिएको च्याम्पियनसिप प्रतियोगिताको समापन संघीय सभा सदस्य गंगा कार्कीबाट गरिएको आयोजकले जनाएको छ ।