थाहा नगर भलिवलका विजेता टिम वडा कार्यालयद्वारा सम्मानित 

गएको फागुन १७ गतेदेखि २१ गतेसम्म चित्लाङको विसिङ्खेलमा भएको थाहा नगरस्तरीय अन्तरवडा भलिवल प्रतियोगिताका विजयी वडा नं. २ का खेलाडीहरुलाई सोमबार एक समारोहबीच सम्मान गरिएको छ । 
२ नं. वडा कार्यालयले आफ्नै सभाकक्षमा विजेती खेलाडी, टिम क्याप्टेन तथा टिम व्यवस्थापकलाई बोलाएर सम्मान गरेको हो । वडा नं. २ का वडा अध्यक्ष गुप्तबहादुर काकीृको अध्यक्षतामा भएको कार्यक्रममा प्रमुख अतिथि थाहा नगरपालिकाका उपप्रमुख खड्ग गोपालीले खेलाडीहरुलाई सम्मान गर्ने परम्पराले उनीहरुको मनोबल उच्च हुनुका साथै आगामी दिनमा खेल क्षेत्रको विकासमा टेवा पुग्ने बताउनु भयो । उहाँले आगामी दिनमा थाहा नगरपालिकाले खेलकुदका लागि बजेट बढाउन ध्यान दिने पनि बताउनु भयो । 
कार्यक्रममा बोल्दै थाहा नगर खेलकुद समितिका संयोजक राजेश केसीले नगर परिषदबाट खेलकुदका लागि छुट्याइएको ८ लाख रुपियाको खर्च विवरण जानकारी गराउँदै बजेटको सीमितताले चाहेर पनि धेरै गर्न नसकेको बताउनु भयो । कार्यक्रममा विशेष आतिथि रहनुभएका थाहा नगरपालिकाका प्रमुख प्रशासकीय अधिकृत हरिलाल पुरीले नगरपालिका योजनाबद्ध ढङ्गले खेलकुदको विकासमा लाग्ने गरी सोचिरहेको बताउनु भयो । उहाँले छिट्टै अन्तर मावि राष्ट्रपति रनिङ शील्ड खेलकुद प्रतियोगिता हुने बताउँदै प्रतिष्पर्धाबाट छानिएका खेलाडीहरुलाई थप प्रशिक्षणको अवसर दिने गरी नगरपालिकाले योजना बनाइरहेको बताउनु भयो । 
कार्यक्रममा नगर कार्यपालिका सदस्य जानुका ढकाल, वडा सदस्य विष्णु बहादुर थापा, पालुङ जेसीजका अध्यक्ष कुमार नेगी, भलिवल खेलाडी किरण थापालगायतले बोल्नु भएको थियो । यसैबीच, प्रतियोगितामा भाग लिने क्रममा २ नं. वडाका खेलाडीहरुबाट भएको ३३ हजार रुपिया बराबरको व्यवस्थापन खर्च वडा कार्यालय र नगर खेलकुद समितिले व्यहोर्ने भएको छ । कार्यक्रममै वडा अध्यक्ष गुप्तबहादुर कार्कीले भन्नु भयो, ‘तपाईंहरु प्रक्रिया पु¥याउ आउनुस्, खर्च हामी व्यहोछौं ।’