थाहानगरमा राष्ट्रपति रनिङ शिल्ड प्रतियोगिता हुने

मकवानपुर थाहा नगरपालिकाको आयोजनामा राष्ट्रपति रनिङ शिल्ड तथा मेयरकप भलिबल प्रतियोगिता आयोजना गरिने भएको छ । प्रमुख प्रशासकीय अधिकृत हरिलाल पुरीको संयोजकत्वमा नगरपालिकामा भएको बैठकले उक्त प्रतियोगिता आयोजना गर्ने निर्णय गरेको हो । 
११ औं गणतन्त्र दिवसको अवसरमा यहि जेठ १४ देखि १६ गतेसम्म प्रतियोगिता आयोजना गर्ने निर्णय भएको छ । रनिङ शिल्ड प्रतियोगितामा छात्र÷छात्रातर्फ एकसय, दुईसय, चारसय र आठसय मिटर दौड प्रतियोगिता हुने भएको छ भने १ हजार पाँचसय मिटरको दौड छात्रतर्फ मात्र हुने भएको छ । 

रिले दौड प्रतियोगिता पनि हुने भएको छ । त्यस्तै छात्र र छात्रा सहभागी हुनेगरी हाइजम्प, लङजम्प र त्रिपल जम्प प्रतियोगिता र  छात्र छात्रा सटफुट प्रतियोगिता आयोजना गरिने नगरपालिकाले जनाएको छ । सो अवसरमा आयोजना गरिने मेयरकप भलिबल प्रतियोगिता पनि छात्रछात्राकै गरिने छ ।  

प्रतियोगिता संचालनको लागि शिक्षा शाखा प्रमुख शोभाकर रेग्मीको संयोजकत्वमा सात सदस्यीय समिति गठन गरिएको छ । समितिको सदस्यहरुमा सानोभाइ कार्की, सूर्यप्रसाद घिमिरे, सुरेन्द्रमान प्रधान, राजेश केसी, अञ्जना लोहोनी र सदस्य सचिव थाहा नगरपालिका सामाजिक विकास शाखा प्रमुख अनिल लामिछाने रहेका छन् ।