तरकारीको नयाँ बजार खोज्न मेयरको आग्रह

थाहा नगरपालिकाका मेयर लवशेर विष्टले थाहा नगरमा उत्पादन भएको तरकारी बिक्रीको लागि नयाँ बजार खोज्नु पर्ने धारणा व्यक्त गरेका छन् । मंगलबार सहकारी समन्वय समिती थाहाको प्रथम बैठकलाई सम्बोधन गर्दै उनले नयाँ बजारको खोजी गरी बजार व्यवस्थापनमा लाग्न आवश्यक रहेको औंल्याए । कार्यक्रममा मेयर विष्टले नयाँ तरकारी बजारको खोजी गर्न नगरका सहकारीहरुलाई आग्रहसमेत गरे  ।

‘तपाईंहरु नयाँ बजारको खोजी र सिर्जनामा लाग्नुहोस्, व्यवस्थापनका लागि नगरपालिकाको तर्फबाट हामी सक्दो सहयोग गर्छौंं’ उनले भने ।

सहकारी समन्वय समिति थाहाका अध्यक्ष महेश्वर सुवेदीको अध्यक्षतामा बसेको बैठकमा  बैठकमा थाहा नगरपालिका उपमेयर खड्ग गोपाली, मकवानपुर जिल्ला सहकारी संघका कोषाध्यक्ष बिमलकुमार ढकाल, जिल्ला कृषि सहकारी संघ मकवानपुर सदस्य राजकुमार केसी लगायत सहभागी थिए । 

बैठकमा थाहा नगरमा उत्पादित तरकारी कुन बजारमा कसरी व्यवस्थापन गर्ने भन्ने विषयमा गहन छलफल भएको थियो । बैठकले नगरमा उत्पादन भएका तरकारी संकलन र बजारीकरणको लागि फणिन्द्र सुवेदीको संयोजकत्वमा समितिसमेत गठन गरेको छ । समितिको सदस्यहरुमा बिमल केसी र शुक्ला गोपाली रहेका छन्  ।