जेसीज कप ब्याडमिन्टन:-सेमिफाइनल समीकरण पुरा

थाहा नगरस्तरीय जेसीज कप डबल ब्याडमिन्टन प्रतियोगिताको सेमिफाइनलको खेल १५ भाद्र दिउँसो २ बजेबाट हुने भएको छ । थाहा नगरपालिका वडा नम्बर ४ क्याम्पाडाँडाको कबर्डहलमा प्रतियोगिता हुने भएको हो । सेमिफाइनल अन्तर्गतको पहिलो खेल रामचन्द्र र बिमल तथा संग्राम र मधुसुदनको टिमबिच हुने प्रतियोगिता संयोजक च्याङ श्रेष्ठले जानकारी दिए ।

सेमिफाइनलको दोस्रो खेल देव र नरेन्द्र तथा सुवास र समाजको टिमबीच हुनेछ । दोस्रो खेल दिउँसो ३ बजे हुने आयोजकले जानकारी दिएको छ । प्रतियोगिताको फाइनल खेल अपरान्ह ४ बजे हुने पालुङ जेसिज वर्ष २०२४ का अध्यक्ष निरज रायमाझीले जानकारी दिए । प्रतियोगिता अवलोकनका लागि अध्यक्ष रायमाझीले अनुरोध गरेका छन् ।

१३ भाद्रबाट शुरु भएको खेल लिगचरण अन्तर्गत खेलाइएको हो । प्रतियोगितामा प्रथम, दोस्रो हुनेले क्रमशः नगद १० हजार, ७ हजार रुपैयाँसहित ट्रफी, मेडल र प्रमाणपत्र प्राप्त गर्ने छन् भने उत्कृष्ट खेलाडीले नगद २ हजार ५ सय रुपैयाँ ट्रफी र प्रमाणपत्र प्राप्त गर्ने छन् । प्रतियोगिताका लागि प्रथम पुरस्कार स्वर्गीय रणबहादुर रायमाझीले प्रायोजन गर्ने भएका छन् । स्वर्गीय रणबहादुर पालुङ जेसीजका अध्यक्ष निरजका हजुरबुवा हुन् ।

थाहा नगरपालिका वडा नम्बर ३ को सहयोगमा भैरहेको प्रतियोगिता पालुङ जेसिजले आयोजना गरेको हो । प्रतियोगिताको समन्वय ब्याडमिन्टन संघ थाहानगर, फरक सोच र शिखर क्लबले गरेको छ । प्रतियोगिताको मिडिया पार्टनरहरुमा पालिका प्रेस डटकम, थाहापाटी, थाहा टाइम्स, बाइरोड न्यूज, दामन एफएम र टिम टेलिभिजन हेटौंडा रहेको छ । सन् २००० मा स्थापना भएको पालुङ जेसिजले विभिन्न सामाजिक कार्यहरु गर्दै आएको छ ।