जात्रा समापन संगै इन्द्रायणी चौर सफा गरियो।

थाहा नगरपालिका, – इन्द्रायणी जात्राको समापनसँगै आज इन्द्रायणी चौरमा सरसफाइ अभियान सञ्चालन गरिएको छ। जात्रामा रहेका व्यापारिक स्टलबाट निस्किएको फोहोरको व्यवस्थापन थाहा नगरपालिकाका प्रमुख बिष्णु बिष्टको नेतृत्वमा नगर प्रहरी, इलाका प्रहरी कार्यालय, इन्द्रायणी भगवती कालाभैरव गुठी, इन्द्रायणी बस्ती, र पालुङका स्थानीय युवाहरूको सक्रिय सहभागितामा गरिएको थियो।
सरसफाइ कार्यक्रममा थाहा नगरपालिकाका प्रमुख प्रशासकीय अधिकृत निरज पौडेल, प्रशासन महाशाखा प्रमुख नवीन खालिङ, लेखा शाखा प्रमुख अमर जिसी, इलाका प्रहरी कार्यालय पालुङका प्रमुख रुक्सा बज्राचार्य, उद्योग वाणिज्य संघ थाहाका उपाध्यक्ष सुरेन्द्रमान प्रधान, इन्द्रायणी भगवती गुठिका अध्यक्ष श्यामभक्त श्रेष्ठ, नगर प्रहरी प्रमुख किरण गिरी, पत्रकार शम्भु अधिकारी, तथा औद्योगिक शान्ती नेपालका अनित बिष्ट लगायतका प्रमुख व्यक्तिहरूको उपस्थिति रहेको थियो।
सरसफाइ अभियानमा जुटेका समुदायका सदस्यहरूले जात्रामा निस्केका फोहोरलाई नगरपालिकाको डम्पिङ साइटमा व्यवस्थापन गरेका थिए । यस क्रममा, तीन दिनसम्म चलेको मेलामा हजारौँ भक्तजनहरूले इन्द्रायणी जात्राको अवलोकन गरेका थिए। इन्द्रायणी जात्रा प्रत्येक ३ वर्षमा एकपटक लाग्ने परम्परा रहेको छ।
थाहा नगरपालिकाको प्रमुख बिष्णु बिष्टले भने, “आजको सरसफाइ अभियानले नगरको स्वच्छता र जनचेतनामा नयाँ दिशा दिएको छ। समुदायको सक्रियताले यो अभियानलाई सफल बनाएको छ।”
इन्द्रायणी जात्राले थाहा नगरको सांस्कृतिक धरोहरलाई अझ मजबुत बनाएको छ र आगामी वर्षमा यो परम्परालाई अझ मजबुतीका साथ निरन्तरता दिने विश्वास व्यक्त गर्नुभयो।