पूर्व जनप्रतिनिधि बलको स्मृतिः टिस्टुङमा फुटबल कप 

थाहा नगपालिका वडा  नं. ११ ले जनप्रतिनिधिको आजीवन स्मृतिको श्रृङ्खला शुरु गरेको छ । गत कात्तिक ११ गते टिस्टुङका  पूर्व जनप्रतिनिधि अष्टमान बलको स्मृतिमा अर्धकद शालिकको उद्घाटन गर्न सफल वडा समितिले शुक्रबारबाट टोल विकास समितिमार्फत् अष्टमान बल स्मृति कप फुटबल प्रतियोगिता शुरु गरेको छ । 

स्थानीय सिर्जनशील टोल विकास संस्थामार्फत् संचालन गरिएको अष्टमान बल स्मृति कप फुटबल प्रतियोगिता यो पहिलोपटक हो । थाहा नगरपालिकाका प्रमुख लवशेर विष्टले प्रथम  फुटबल कप प्रतियोगिताको उद्घाटन गर्नुभयो ।  प्रतियोगिताको उद्घाटन गर्दै नगरप्रमुख विष्टले स्वर्गीय अष्टमान बलको सामाजिक एवम् राजनीतिक योगदानको चर्चासमेत गर्नुभयो ।

आयोजक संस्थाका अध्यक्ष विक्रम गोलेको अध्यक्षतामा सम्पन्न प्रतियोगिताको उद्घाटन कार्यक्रममा  नेपाल पत्रकार महासंघका वागमती प्रदेश अध्यक्ष प्रताप विष्ट, मकवानपुर जिल्ला फुटबल संघका अध्यक्ष टिका लामा, जिल्ला खेलकुद विकास समिति मकवानपुरका अध्यक्ष सानु लामा , जिल्ला बडी बिल्डर्स संघका अध्यक्ष सुनिल लोप्चन लगायतले बोल्नुभएको थियो । 

कात्तिक ३० गतेसम्म संचालन हुने प्रतियोगितामा मकवानपुर र धादिङका गरी १७ टिमले भाग लिएका छन् ।