जनकल्याण द्वारा राष्ट्रपति रनिङ शिल्डमा पदक बिजेता विद्यार्थीहरुलाई सम्मान

थाहा नगरपालिका वडा न ३ मा अवस्थिथि जनकल्याण माबिले  राष्ट्रपति रनिङ शिल्ड तथा मेयर कप भलिबल प्रतियोगिता २०८० मा उत्कृष्ट प्रदर्शन सहित बिजेता हुने खेलाडी विद्यार्थी हरुलाई बधाई तथा सम्मान गरेको छ।
 विद्यालयको प्रागणमा विद्यालय  व्यवस्थापन समितिका सदस्य मेनुका आचार्यको अध्यक्षतामा सम्पन्न कार्यक्रममा व्यवस्थापन समितिका सदस्यहरु,शिक्षक अभिभावक संघका प्रतिनिधिहरु ,पालुङ्ग बहुउद्देश्यीय सहकारी संस्थाको अध्यक्ष तथा पुर्व शिक्षक कृष्ण बहादुर बिष्ट , पालुङ क्याम्पसका प्राध्यापक प्रकाश पौडेल,विद्यालयका पुर्व लेखापाल मधुसूदन रायमाझी पत्रकार शम्भु अधिकारी लगायत शिक्षक,विद्यार्थीहरुको उपस्थिति रहेको थियो।

नगरपालिकास्तरीय रनिङशिल्ड प्रतियोगितामा   जनकल्याण माबिले  १७  स्वर्ण,१४ रजत र ७ कास्य पदक सहित शिल्ड हात पारेको 
प्रधानाध्यापक सानोभाइ कार्कीले बताए। कार्यक्रममा प्रधानाध्यापक कार्कीले विजयी विद्यार्थीलाई टीका र खादा लगाएर सम्मान गरे।
उनले भने,‘पालिकास्तरीय राष्ट्रपति रनिङशिल्ड प्रतियोगितामा हाम्रो यस विद्यालयबाट सहभागी छात्र, छात्राहरूले  खेलहरूमा प्रथम, द्वितीय र तृतीय स्थान हासिल गर्न सफल भएका छन्। साथै नगरपालिका अन्तर्गत सहभागी रहेको १३ वटा  विद्यालयहरूमध्ये हाम्रो विद्यालयले प्रथम स्थान हासिल गर्न सफल भएको छ।’ उनले यो सफलता विद्यालयका सम्पूर्ण शिक्षक तथा कर्मचारीको सफलता भएको बताए।