अन्तरपालिका स्तरिय फुटबल प्रतियोगितामा थाहानगरको पहिलो जित

हेटौंडामा संचालन भइरहेको अन्तरपालिका मकवानपुर जिल्ला स्तरिय फूटबल प्रतियोगितामा थाहा नगरपालिका फुटबल टिमले पहिलो जित हाँसिल गरेको छ। हेटौंडाको हुप्रा चौरमा सोमबार भएको प्रतियोगितामा थाहा नगरपालिकाले मकवानपुरगढी गाउँपालिकालाई ४-० गोल अन्तरले पराजित गरेको हो । 

मकवानपुर गढी विरुद्ध थाहानगरको तर्फबाट राजन गोलेले ह्याटि्रक गर्नुभएको थियो भने सन्देश बलले १ गोल गर्नुभएको  थाहा नगरपालिका सामिजिक बिकास शाखा प्रमुख अनिलन लामिछानेले बताउनुभयो ।

आजको प्रतियोगिताका म्यान अफ द म्याच थाहानगरका राजन गोले घोषित भए । उनलाई जिल्ला खेलकुद विकास समिति मकवानपुरका अध्यक्ष सानु लामाले ट्रफी हस्तान्तरण गरे । 

प्रतियोगिताको विजेता तथा उपविजेता टिमले क्रमशः २ लाख र १ लाख रुपैयाँ प्राप्त गर्नेछन् । सर्वोत्कृष्ट खेलाडीले ५ हजार रुपैयाँ तथा विधागत अन्य उत्कृष्ट खेलाडी तथा प्रशिक्षकले जनही ३/३ हजार रुपैयाँ पुरस्कार प्राप्त गर्नेछन् ।

यहि मंसिर १८ गतेबाट संचालन भएको प्रतियोगितामा मकवानपुरका १० वटै पालिकाको फुटबल टिमको सहभागिता रहेको छ । नकआउट चरणका  आधारमा संचालन भएको प्रतियोगिता २५ मंसिरसम्म संचालन हुनेछ ।

प्रतियोगिता जिल्ला समन्वय समिति मकवानपुरको आयोजना र जिल्ला खेलकुद बिकास समिति मकवानपुरको ब्यवस्थापनमा संचालन गरिएको हो ।