१ हजार भिटिएम आएपछि थाहामा कोरोना परीक्षण सहज

डोटेरा हिलिङ ह्याण्ड्स र डोटेरा को–इम्प्याक्टको सहयोगमा च्वाइस नेपालले एक हजार थान भिटिएम उपलब्ध गराए पछि अब थाहा नगरपालिकामा कोरोना परीक्षणको दायरा बढाउन सहज भएको छ । 

नगरमा हाल तीन सय थानमात्र भिटिएम बाँकी रहेको अवस्थामा च्वाइस नेपालमार्फत् प्राप्त सहयोगले थाहामा समुदाय स्तरमा पिसिआर परीक्षण गर्न सहज भएको थाहा नगरपालिकाका प्रमुख लवशेर विष्टले बताउनु भयो । 

नगरपालिकाले प्रत्येक वडामा ७० जनाको हाराहारीमा पिसिआर परीक्षण गर्ने निर्णय गरिसकेको छ । कोरोना संक्रमण भए नभएको बारे पिसिआर परीक्षणका लागि स्वाब संकलन गर्न भिटिएम प्रयोग हुन्छ । 

च्वाइसले थाहा नगरपालिकालाई एक हजार थान भिटिएमसहित ५ हजार थान सर्जिकल मास्क, ३ सय एनके मास्क, ५० थान पिपिई सेट लगायत सामग्री उपलब्ध गराएको छ । पालुङ प्राथमिक स्वास्थ्य केन्द्रका डाक्टर सुवोध चापागाईंले च्वाइस नेपालको कार्यालय बानेश्वर पुगेर सहयोग सामग्री बुझ्नु भएको हो । 

सामग्री हस्तान्तरण कार्यक्रमपछि थाहापाटीसित कुरा गर्दै डा. चापागाईंले थाहामा कोरोना रोकथाम र नियन्त्रण गर्न च्वाइस नेपालको सहयोगले निकै सहज भएको बताउनु भयो । 

त्यसैगरी, च्वाइस नेपालका राष्ट्रिय कार्यकारी निर्देशक प्रतिक शर्माले कोरोना नियन्त्रणका लागि थाहा नगरपालिकालाई केही सहयोग गर्न सकेको भन्दै खुशी व्यक्त गर्नुभयो । ‘थाहामा खानेपानीमा काम ग¥यौं, शिक्षामा काम ग¥यौं, अब कोरोना नियन्त्रणमा पनि केही गरौं भनेर सानो सहयोग गरेको हो, शुरुमा १ हजार थान भिटिएमको कुरा आएकोले त्यही अनुसार व्यवस्थापन गरियो, पछि थप आवश्यक प¥यो भने केही सोचौंला,’ उहाँले भन्नु भयो । च्वाइस नेपालले थाहानगरमा निर्माण हुन लागेको प्रस्तावित १५ सैया अस्पताललाई पनि सहयोग गरेको जानकारी दिनुभयो । 

अहिलेसम्म थाहा नगरपालिकामा गरिएको सहयोग सार्थक सावित भएको भन्दै डोटेराका नेपाल प्रतिनिधि राजेश अधिकारीले थाहा नगरपालिकाको कार्यशैलीको प्रशंसा गर्नुभयो । 

च्वाइस थाहा नगरपालिकाको नगरसभाबाट पुरस्कृत संस्था हो ।