रुदाने’को सालिकमा माल्यार्पण, श्रमलाई प्राथमिकता दिनुपर्नेमा वक्ताहरूको जोड

थाहा नगरपालिका,
थाहा नगरपालिकाको आयोजनामा श्रमिक नेता एवं थाहा दर्शनका प्रणेता रुपचन्द्र बिष्ट ‘रुदाने’ को सम्झनामा विशेष कार्यक्रम सम्पन्न भएको छ। कार्यक्रम नगर प्रमुख बिष्णु बिष्टको अध्यक्षतामा विकास घरको प्रांगणमा रहेको रुदानेको सालिकमा माल्यार्पण गर्दै सम्पन्न भयो।
कार्यक्रममा वक्ताहरूले रुपचन्द्र बिष्टको योगदान स्मरण गर्दै “श्रमलाई प्राथमिकता दिन सक्नु नै उनलाई सच्चा श्रद्धाञ्जली दिने तरिका हो” भन्ने धारणा राखेका थिए। उनीहरूले बिष्टको जीवन र विचार आज पनि सान्दर्भिक रहेको बताए।
कार्यक्रममा उपप्रमुख भरत गोपाली, स्थानीय स्मारक समितिका अध्यक्ष बिमल कुमार बिष्ट, जिल्ला बहुउद्देश्यीय सहकारीका कोषाध्यक्ष बिमलकुमार ढकाल, माओवादी, जिल्ला समन्वय सदस्य अरुण रायमाझी, जनमुखी सहकर्मी ज्योती रायमाझी लगायतका वक्ताहरूले रुपचन्द्र बिष्टको राजनीतिक, सामाजिक योगदान र थाहा दर्शनको महत्त्वमाथि चर्चा गरेका थिए।
कार्यक्रममा विभिन्न राजनीतिक दलका प्रतिनिधि, वडा अध्यक्षहरू तथा जनमुखी सहकर्मीहरूको उपस्थित रहेको थियो। वक्ताहरूले रुदानेले नेपाली समाजमा श्रम, न्याय, समानताको आवाज उठाएको उल्लेख गर्दै उहाँको आदर्श पछ्याउनु आजको आवश्यकता भएको बताए।
रुदानेको संक्षिप्त जीवन परिचय:
• जन्म: १९९० साल पुस २६ गते, मकवानपुरको दामन घर्तीखोला
• राजनीतिक योगदान: २०२८ सालमा स्नातक कोटाबाट राष्ट्रिय पञ्चायत सदस्य निर्वाचित
• राजनीतिक उत्पीडन: प्रजातन्त्रवादी विचारका कारण राष्ट्रिय पञ्चायत सदस्य रहँदा पनि पक्राउ परेका
• दर्शन: 'थाहा दर्शन' का प्रवर्तक, श्रमिक र किसानका हक अधिकारका पक्षपाती
• निधन: २०५६ साल असार ७ गते