राजनैतिक नेतृत्वले गरेको निर्णय,प्रशासनिक नेतृत्वले रोक्ने गरेको छ:-प्रमुख सचेतक बर्तौला

एमाले संसदीय दलका प्रमुख सचेतक महेश बर्तौलाले राजनीतिक नेतृत्वले गरेका नीति निर्णयलाई प्रशासनिक नेतृत्वले रोक्ने गरेको आरोप लगाएका छन् । उद्योग संघ मकवानपुरको २३औँ साधारण सभालाई सम्बोधन गर्दै प्रमुख सचेतक बर्तौलाले प्रशासनिक नेतृत्वको कारणले नागरिकलाई विकास निर्माण तथा सेवा प्रवाहमा समस्या भइरहेको दावी गरे ।

‘प्रशासनिक नेतृत्वको कारण डेलिभरिमा समस्या छ । राजनीतिक नेतृत्वले गरेका नीति निर्णयलाई प्रशासनिक नेतृत्वले रोक्ने गरेको छ,’ उनले भने । मध्यवर्ती क्षेत्रको नाममा हेटौंडाको मयुरधाप औद्योगिक क्षेत्र निर्माणको काममा रोक्ने काम गरेको भन्दै उनले असन्तुष्टि व्यक्त गरे । ‘९ वर्षदेखि मयुरधाप औधोगिक क्षेत्रको काम अघि बढ्न सकेको छैन । उद्योग मन्त्रालयले समस्या हटाउन फाइल उठाउने पेश गर्ने काम गर्‍यो तर वनको विभिन्न कारणले औद्योगिक क्षेत्रको काम हुन सकेको छैन,’ बर्तौलाले भने ।

उद्योग मैत्री वतावरण निर्माण राज्यले गर्नुपर्ने भन्दै उनले राजनीतिक अस्थिरताका कारण उद्योगमैत्री वातावरण निर्माण हुन नसकेको बताए । आर्थिक संकटका कारण हेटौंडा सिमेन्ट उद्योग कोमामा पुगेको उनको भनाइ छ ।

ुलगानीमैत्री वातावरण निर्माण गर्न राज्यले कच्चा पदार्थमा कम राजस्व लगाएको उल्लेख गर्दै राज्यले प्रशासनिक समस्या हल गर्दै उत्पादित वस्तुको बजार राज्यले गर्नु जरुरी रहेको उनको बताए । 

उद्योगहरुको समस्याका बारेमा नीति संवादका माध्यमबाट छलफल गरी बलियो अर्थतन्त्र, रोजगारी सृजना तथा आयात प्रतिस्थापनका लागि काम गर्नुपर्नेमा उनले जोड दिए ।
वर्तमान एमाले–कांग्रेस गठबन्धनको सरकारले केही गर्ने प्रयत्न गरिरहेको उनको दावी छ । अघिल्लो सरकारले बनाएको बजेटमा काम गर्नुपर्ने अवस्था रहेकाले केही असहज अवस्थाहरु आइपरेको उनले वताए । 

कार्यक्रममा उद्योग संघ मकवानपुरका अध्यक्ष बद्रीनाथ शर्माले राजस्व वृद्धिमा सरकारको ध्यान जाँदा आयात बढिरहेको र सरकार आयातमुखी बन्दा उद्योगमैत्री वातावरण बन्न नसकेको उनले बताए ।