थाहानगरमा एक हप्ता लकडाउन घोषणा गर्न सुझाव 

थाहा नगरमा कोरोना भाइरस संक्रमणको जोखिम कर्म गर्न अहिलेलाई कम्तिमा एक लकडाउन घोषणा गर्न सर्वपक्षीय बैठकले नगरपालिकालाई सुझाव दिएको छ । बैठकमा सहभागी राजनीतिक दल तथा स्थानीय संघसंस्थाका प्रतिनिधिहरुले थाहामा कोरोनाको जोखिम बढ्दै गएकोप्रति चिन्ता व्यक्त गर्दै लकडाउन गरेरै भए पनि स्थितिलाई नियन्त्रणमा राख्नुपर्ने सुझाव दिएका छन् । 

थाहा नगरपालिकामा कोरोना भाइरसको जोखिम बढ्दै गएपछि कसरी नियन्त्रण र रोकथाम गर्न सकिन्छ भन्ने विषयमा सरोकारवालाहरुको धारणा बुझ्न नगरपालिकाले आज सोमबार दिउँसो सर्वपक्षीय बैठकको आयोजना गरेको थियो ।

बैठकपछि थाहापाटीसँग कुरा गर्दै बैठकमा सहभागी नेपाल कम्प्युनिष्ट पार्टी(नेकपा) थाहा नगरका अध्यक्ष अरुण रायमाझीले औषधि पसलबाहेक सबै सेवा बन्द गर्नेगरी लकडाउन गर्न सुझाव दिएको बताउनु भयो । ‘सबैले आआफ्नो धारणा राख्नुभयो, कुनै न कुनै रुपमा नगरपालिका कडा ढंगले प्रस्तुत हुनु पर्नेमा सबैको जोड रह्यो’ उहाँले भन्नु भयो ।

बैठकमा नेकपा थाहानगर अध्यक्ष रायमाझी, नेपाली काँग्रेसका थाहानगर सभापति योगेन्द्रमान श्रेष्ठ, सहकारी संजाल थाहाका अध्यक्ष महेश्वर सुवेदी, थाहा नगर उद्योग वाणिज्य संघका अध्यक्ष कविराज खत्री, प्याब्सन थाहानगरका अध्यक्ष सुरेन्द्रमान प्रधान, पालुङ जेसीजका अध्यक्ष मनोज रायमाझी, उपभोक्ता हित संरक्षण मञ्च थाहाका अध्यक्ष गणेशमान श्रेष्ठलगायतको सहभागिता रहेको थियो । 

बैठकपछि थाहापाटीसित कुरा गर्दै थाहा नगरपालिकाका सामाजिक शाखा प्रमुख अनिल लामिछानेले लकडाउन गरेर अघि बढ्ने गरी सबैको सुझाव आएको जानकारी दिनुभयो । ‘मुख्य सरोकारवालाहरुबाट लकडाउनको प्रस्ताव र प्रतिवद्धता आएको छ, यसबारे भोलिको कार्यपालिका बैठकमा छलफल हुन्छ’ उहाँले भन्नु भयो । 

थाहा नगर कार्यपालिकाको बैठक भोलि  मंगलबार विहान बस्दैछ ।