२ सय ३० प्रतिशतसम्म बढ्यो तरकारीको मूल्य

एक महीनाको अवधिमा काठमाडौंमा हरियो तरकारीको मूल्य २ सय ३० प्रतिशतसम्म बढेको पाइएको छ । कालीमाटी फलपूmल तथा तरकारी बजार विकास समितिको दैनिक मूल्यसूचीअनुसार गएको १ महीनाको अवधिमा हरियो तरकारीको मूल्य यति धेरै बढेको पाइएको हो ।

वर्षात् शुरू भएसँगै किसानहरूले तरकारी लगाएको जमीनमा धान रोपाइँ शुरू गरेकाले तरकारीको उत्पादन घट्न गई मूल्य बढेको हो ।

जेठ १६ गते प्रतिकिलो ३५ रुपैयाँ थोक मूल्य रहेको हाइब्रिड घिउ सिमीको मूल्य असार १६ मा २ सय ३० प्रतिशतले वृद्धि हुँदै १ सय १५ रुपैयाँ कायम भएको पाइएको छ । स्थानीय काउलीको मूल्यमा २ सय प्रतिशतले वृद्धि हुँदै प्रतिकिलो २५ रुपैयाँबाट ७५ रुपैयाँ पुगेको छ । तितेकरेलाको मूल्य १ सय ४२ प्रतिशतले वृद्धि हुँदै प्रतिकिलो २७ रुपैयाँबाट ६५ रुपैयाँ पुगेको छ ।

त्यसैगरी भिन्डीको मूल्य पनि १ सय १५ प्रतिशतले वृद्धि हुँँदै प्रतिकिलो ३५ रुपैयाँबाट ७५ रुपैयाँ पुगेको छ भने राजमाको मूल्य पनि २ सय प्रतिशतले बढेर प्रतिकिलो ३५ रुपैयाँबाट १ सय ५ रुपैयाँ पुगेको छ । घिरौला, लौका, बोडीलगायतका तरकारीको समेत प्रतिकिलो २० रुपैयाँदेखि ३५ रुपैयाँसम्म मूल्य बढेको छ ।

अहिले वर्षाद्को समय भएकाले तरकारीको उत्पादन कम भएको छ । तरकारी उत्पादन भइरहेको जमीनमा धान रोप्ने काम भइरहेकाले पनि हरियो तरकारीको उत्पादन घटी मूल्य बढेको कालीमाटी फलफूल तथा तरकारी बजार विकास समितिका सूचना अधिकारी विनय श्रेष्ठले आर्थिक अभियान दैनिकसँग बताए ।

‘खासगरी अहिले तरकारीको उत्पादन कम भएकाले नै मूल्य बढेको हो,’ उनले भने । उनका अनुसार यतिबेला भारतमा पनि वर्षाद्का कारण तरकारी उत्पादन घटेको छ । भारतबाट नेपालमा कम तरकारी भित्रिँदा पनि मूल्य बढेको हो ।

निषेधाज्ञा खुकुलो भए पनि तरकारीको आगमनमा खासै सुधार नभएको समितिको तथ्यांकले देखाएको छ । समितिका अनुसार कडा निषेधाज्ञाका समयमा गएको जेठ १४, १५ र १६ गते क्रमशः साढे ५ सय, ५ सय र ६ सय मेट्रिकटन तरकारी कालीमाटीमा भित्रिएको थियो । निषेधाज्ञा खुकुलो भए पनि तरकारीको आयात सुध्रिन सकेको छैन । असार १४ गते ७ सय मेट्रिकटन, १५ गते ६ सय मेट्रिकटन र १६ गते दिउँसो सम्म करीब ५ सय मेट्रिकटन मात्र तरकारी भित्रिएको छ । सामान्य अवस्थामा कालीमाटीमा दैनिक ९ सय देखि १ हजार मेट्रिकटन सम्म तरकारी भित्रिने गर्छ ।

अहिले भारतबाट करीब ३० प्रतिशत मात्र हरियो तरकारी भित्रिइरहेको अनुमान व्यवसायीहरूको छ । कालीमाटी फलफूल तथा तरकारी बजार व्यवसायी समितिका अध्यक्ष गीताप्रसाद आचार्यले यतिबेला धादिङ, मकवानपुर, दोलखा, काभ्रेलगायत जिल्लाबाट काठमाडौंमा तरकारी भित्रिइरहेको बताए ।

 आर्थिक अभियानबाट