२० हजार टन युरिया मल भित्रियो।

कृषि सामग्री कम्पनीले ग्लोबल टेण्डरबाट खरिद गरेको ३० हजार टन युरिया मलमध्ये २० हजार टन भित्रिएको छ । कम्पनीको मधेस प्रादेशिक कार्यालय वीरगन्जका सूचना अधिकृत आलोक कुमारका अनुसार वीरगन्जस्थित सिर्सिया सुक्खा बन्दरगाह र वीरगन्जको सिमावर्ती भारतीय सहर रक्सौल रेल्वे स्टेसनमा गरी ८ रेल्वे र्‍याकमा मल आइपुगेको हो । सामान्यतया एक रेल्वे र्‍याकले २ हजार ५ सय टन मल बोक्ने गर्छ । 

कम्पनीले ग्लोबल टेण्डरबाट खरिद गरेको उक्त मल आपूर्तिको ठेक्का स्विस सिंगापुर कम्पनीले पाएको छ । उसले मलेसियाबाट खरिद गरी भारतको कोलकता बन्दरगाह हुँदै नेपालमा मल ल्याइरहेको छ । कुल ३० हजार टन मध्ये १२ हजार टन वीरगन्ज, १० हजार ५ सय टन भैरहवा र बाँकी ७ हजार ५ सय टन मल कम्पनी विराटनगर प्रादेशिक कार्यालयले पाउने छन् ।

वीरगन्ज र भैरहवाको मल वीरगन्ज नाका हुँदै भित्रिन्छ भने बिराटनगरको मल कोलकताबाट सोझै ट्रकमा बिराटनगर ल्याइँदै छ । चैते धान बाली सिजनका लागि ल्याइएको मल माग भएका जिल्लाहरुमा परिचालन समेत भइरहेको कुमारले जानकारी दिए । यसअघि ‘जीटूजी’ प्रक्रियाबाट भित्रिएको युरिया मल माग भएका जिल्लाहरुमा परिचालन समेत भइसकेको उनले बताए ।

२० हजार टन डीएपी कोलकता आइपुग्यो

कम्पनीले ग्लोबल टेण्डरबाट खरिद गरेको २० हजार टन डीएपी मल पनि कोलकता बन्दरगाह आइसकेको कुमारले जानकारी दिए । स्विस सिंगापुर कम्पनी नै आपूर्तिकर्ता रहेको सम्झौताको मल शुक्रबार कोलकता बन्दरगाह आइपुगेको उनले बताए । ‘कोलकाता आइपुगेको मल अहिले त्यहाँ रि प्याकिङको काम भइरहेको छ,’ उनले भने, ‘फागुन २८ पछि नेपाल आइपुग्न थाल्छ ।’ यो मल पनि चैते धान बाली सिजनकै लागि ल्याइएको उनले बताए ।

इकान्तिपुर