बाँदर आतङ्कले थाहाका कृषक हैरान

बाँदरले हुर्कदै गरेको बालीनाली सखाप पार्न थालेपछि मकवानपुरको थाहा नगरपालिकाका कृषकहरु हैरान भएका छन् । थाहाको चित्लाङ, बज्रवाराही, टिस्टुङ, पालुङ, घर्तिखोला, दामन लगायत क्षेत्रका किसानहरु ‘बाँदर आतङ्क’ ले हैरान भएका हुन् ।

सैयौंको संख्यामा रहेका बाँदरहरुको समूहले बालीनाली सखाप पारेर आफूहरु आतङ्कित भएको थाहा नगरपालिका वडा नं. ४ का राजु भुजेलले बताउनु भयो । लकडाउनको बेला मेहनत गरेर लगाएको बन्दा विक्री गर्ने बेलामा जङ्गलबाट बाँदरको बथान आएर सिनित्तै हुने गरी खाइदिएको उहाँले बताउनुभयो । 

थाहाका १२ वटै वडाहरुमा धेरथोर बाँदर आतङ्क रहेको स्थानीयहरुले बताएका छन् । गाउँमा बाँदरले मकै, भटमास, बन्दा, मूला, गाँजर लगायत फलफूल, तरकारी र अन्नबाली सखाप पारेको थाहा नगरपालिका वडा नं. ३ का सुरज मोक्तानले बताउनुभयो । 
बालीनालीलाई बाँदरबाट जोगाउन विहान उज्यालो भएदेखि साझ नपरुन्जेलसम्म खेतीमै बस्ने गरेको किसानहरु बताउँछन् । २४ सै घण्टा बालीनाली कुरेर बस्नु पर्ने बाध्यता भएकोले परिवारका सदस्यहरु आलोपालो गरी बाली छेउमै बस्ने गरेको उनीहरुको भनाइ छ । 

पछिल्लो समयमा बाँदरले टेर्न समेत छाडेको किसानहरु बताउँछन् । हत्तपत्त नभाग्ने  र भागीहाले पनि तुरुन्तै बाली खान फर्किने गरेको किसानहरुको गुनासो छ । 

थाहानगरको ठाउँठाउँबाट बाँदरले आतङ्क मच्चाएको खबर आएपछि थाहा नगरपालिका कृषि शाखा पनि चिन्तित बनेको छ । ‘कानुन अनुसार बाँदर मार्न पाईदैन, भगाउने नै हो तर त्यसो पनि गर्न सकिएको छैन,’ कृषि शाखा प्रमुख संजय तिवारीले भन्नु भयो, ‘नगरपालिकामा बाँदर भगाउने यन्त्र ल्याउने विषयमा छलफल चलिरहेको छ ।’