हेटौंडामा रोकिएको कोरोना बिरुद्धको खोप अभियान सुरु

२६ जेठ, हेटौंडा । हेटौंडा उपमहानगरपालिकामा अन्तिम समयमा रोकियो भनिएको कोरोना बिरुद्धको खोप अभियान सुरु भएको छ । हेटौंडा उपहानगरपालिकाका जनस्वास्थ्य निरीक्षक तथा कोभिड फोकल पर्सन भोला चौलागाईंले खोप अभियान सुरु भएको जानकारी दिनुभयो।

सरकारी मापदण्ड अनुसार हेटौंडा उपमहानगरपालिकामा आजदेखि लगाउँन सुरु गरिने भनिएको कोरोना विरुद्धको खोप अभियान अन्तिम समयमा आएर हेटौंडा उपमहानगरपालिका प्रमुख हरि बहादुर महतको निर्देशनमा रोकिएको थियो ।
 

हेटौंडा उपमहानगरपालिका क्षेत्रमा आजदेखि चीन सरकारको सहयोगमा आएको कोरोना विरुद्धको खोप ‘भेरोसेल’ लगाउँने तयारी भएको थियो । तर हेटौंडा उपमहानगरपालिकाका प्रमुख महतले  खोप लगाउने विषयमा अन्यौलता भएकाले पत्रकार सम्मेलन गरी जानकारी दिएर मात्रै खोप लगाउँन सुरु गर्ने बताउनुभएको थियो ।
 

केही प्राविधिक समस्या नभए खोप अभियान उपमहानगरपालिकाका १९ वटै वडामा आजैबाट सुरु हुने निरीक्षक चौलागाईले बताउनुभयो। 
 

स्वास्थ्य तथा जनसंख्या मन्त्रालयले काठमाडौं उपत्यका भित्र ६० देखि ६४ बर्ष र उपत्यका बाहिर ६२ देखि ६४ बर्ष उमेर समूहका लागि खोप लगाउँने जनाएको छ । सरकारले मकवानपुरका १० स्थानिय तह मध्ये हेटौंडा उपमहानगरपालिकामा सबैभन्दा बढी २ हजार ७ सय डोज खोप पठाएको छ ।