साउनभर शिवभक्तका लागि थाहा सेवा समाजको सेवामूलक अभियान, निःशुल्क पानी र फलफूल वितरण गरिने

थाहा, मकवानपुर । साउन महिनामा थाहा नगरपालिकाभित्र रहेका विभिन्न शिवालयमा दर्शनका लागि आउने श्रद्धालु भक्तजनको सहजतालाई मध्यनजर गर्दै थाहा सेवा समाज ले निःशुल्क पिउने पानी तथा फलफूल वितरण कार्यक्रम सञ्चालन गर्ने भएको छ।
समाजका अनुसार साउन महिनाभर विशेषगरी दामनस्थित ऋषिकेश्वर महादेव मन्दिर, पालुङको पाण्डुकेश्वर महादेव मन्दिर र चम्पकेश्वर महादेव मन्दिर लगायतका शिवालयमा दर्शनार्थीको उल्लेखनीय भीड हुने अपेक्षासहित सेवामूलक अभियान सञ्चालन गर्न लागिएको हो।
कार्यक्रमअन्तर्गत प्रारम्भिक चरणमा ऋषेश्वर, पाण्डुकेश्वर र चम्पकेश्वर महादेव मन्दिरमा १०/१० जना स्वयंसेवक परिचालन गरिनेछ। अन्य शिवालयहरूमा पनि भक्तजनको चापका आधारमा आवश्यकताअनुसार स्वयंसेवक परिचालन गरी निःशुल्क पिउने पानी तथा फलफूल वितरण गरिने समाजले जनाएको छ।
समाजले सेवामूलक अभियानलाई सफल बनाउन स्थानीयवासी, सरोकारवाला निकाय तथा इच्छुक स्वयंसेवकहरूको सहयोग, सुझाव र सक्रिय सहभागिताको अपेक्षा गरेको छ।
"निःस्वार्थ सेवा नै धर्म हो" भन्ने मूल भावनासहित सञ्चालन हुने उक्त कार्यक्रम साउन महिनाभर निरन्तर सञ्चालन गरिने थाहा सेवा समाजले जनाएको छ।