शिखरकोट र थानाबजारका अग्रभागमा काम गर्नेहरुको पिसिआर रिपोर्ट नेगेटिभ, थाहानगरमा समुदायमा कोरोनो जोखिम नरहेको पुष्टि हुँदै

तत्काललाई थाहा नगरपालिकामा समुदाय स्तरमा कोरोनाको जोखिम नरहेको पुष्टि हुँदै गएको छ । नगरपालिकाले अहिलेसम्म सबैभन्दा ठूलो संख्या अथात् १३१ जनाको स्वाब एकैपटक प्रयोगशालामा पठाएकोमा सबैको रिपोर्ट नेगेटिभ आएपछि समुदायमा कोरोनाको जोखिम नरहेको टिप्पणि शुरु भएको छ । १३१ मध्ये १३० को रिपोर्ट नेगेटिभ आएको स्पष्ट भैसकेको र एकजनाको युजरनेम र पासवर्ड नमिलेकोले थाहा पाउन नसकिएको  पालुङ प्राथमिक स्वास्थ्य केन्द्रका डाक्टर सुवोध चापागाईंले बताउनुभयो । 

नगरपालिकाले अस्ती भदौ ११ गते काठमाण्डौंस्थित राष्ट्रिय जनस्वास्थ्य प्रयोगशालामा पठाएको १३१ जनाको स्वाबको परीक्षण तुरुन्तै भएर दुई दिनमै रिपोर्ट आएको हो । 

सामुदायिक कोरोना भाइरस कन्ट्याक्ट ट्रेसिङ परीक्षण अन्तर्गत नगरपालिकाको वडा नम्बर २, ३ र ४ का अग्रभागमा खटिने कर्मचारी, पत्रकार, व्यवसायी, सहकारीकर्मी, शिक्षक, संघसंस्थाका प्रतिनिधि लगायतको स्वाब संकलन गरी पठाइएको थियो । १३१ मध्ये वडा नम्बर ६ बज्रवाराहीस्थित प्यासिफिक सहकारी र विसिङ्खेलका १ जनाको स्वाब संकलन गरिएको थियो । 

दामन एफएम, कृषि विकास बैंक, जनकल्याण मावि, नेपाल विद्युत प्राधिकरण, पालुङ बहुउद्धेश्यीय सहकारी संस्था, नेपाल बैंक लिमिटेड, फरक सोच, विमा कम्पनी, फर्निचर, वडा कार्यालय, व्यापार÷व्यवसाय, होटल, पुनर्निर्माण प्राधिकरण, पुस्तक व्यवसाय, मोटर पार्टस्, पालुङ जेसीज लगायत थाहा नगरपालिकाको शिखरकोट र थानाबजार क्षेत्रका सरकारी, गैरसरकारी, बैंक, वित्तीय, सहकारी लगायत जनसम्पर्क हुने व्यक्तिहरुको परीक्षण गर्दा सबैको रिपोर्ट नेगेटिभ आएको छ । 

कोरोनाको जोखिम बढ्न सक्ने सम्भावनालाई मध्यनजर गर्दै निषेधाज्ञा नै जारी गरेर समुदाय स्तरमा कोरोना परीक्षणको काम तीव्र पारिएको थाहानगरमा परीक्षण रिपोर्ट धमाधम नेगेटिभ आउन थाले पछि तत्काललाई समुदायमा कोरोना नफैलिएकोतर्फ संकेत गरेको थाहा नगरपालिकाका प्रमुख लवशेर  विष्टले बताउनु भयो ।